Spurs-ah Tonali a chiang ta

Season hman zawh taka relegation battle hmachhawntu Tottenham Hotspur-in buai nawn an tum tawh lo a, transfer bazar-ah an che na rem rem hle - Newcastle United aṭangin Sandro Tonali chu an club player man to ber ni turin an la lut.

Spurs hian kum 26 mi midfielder manah hian pound maktaduai 100 thleng an insen a ṭul mai thei. An inremna ang chuan £92.5mtd an pe phawt ang a, a khelh ṭhat dan a zir leh club result a zirin £7.5mtd an pe ang.

Tonali chuan, "Spurs ka zawm thei hi ka hlim hle. Mi ṭhenkhatin club dang nen pawh indawr angin min sawi a, mahse, ka rilruah club pakhat bak an awm lo," a ti a, club dang nen sawizawm ni mah se, Spurs-in a rilru an hmin thu a sawi.

Magic ang mai!

Spurs midfielder thar Tonali chuan, "Head coach Roberto de Zerbi nen kan indawr a, darkar hnih vel zet chu he club chungchang, fans, stadium leh football sawiin kan inbia.

"Ka tan chuan magic ang mai a ni a, Tottenham zawm ka ngai tih kha ka hrethiam nghal. Spurs hi ka lo hmachhawn fo tawh a, fans ṭha tak in nei tih pawh ka hria. Season thar ka nghakhlel tawh hle," a ti.

Spurs boss De Zerbi chuan, "Tonali hi ka seilenna khaw club Brescia aṭanga inzir chhuak a nih avangin ka hriatna a rei tawh. Player ṭha tak a nih avangin duhtu club pawh an tam. Mahse, amah hian Spurs zawm a duh a, fans pawhin an lo lawm ang tih ka chiang," a ti a, a player thar a fak.

Spurs an hausa

London club hian tun nipui transfer-ah player an la lut nual tawh a, De Zerbi hoin nomawi chawi an tum dawn tih an tilang - West Ham aṭangin Mateus Fernandes chu £85mtd-in an la lut tawh a, an sum sen hi a tam rem rem hle.

Brighton & Hove Albion aṭangin centre back Jan Paul van Hecke chu £52mtd-in an la lut tawh a, Liverpool left back Andy Robertson leh Bournemouth centre back Marcos Senesi te chu free transfer-in an la lut tawh bawk.

Spurs hian tun nipuiah player lakluh nan £237mtd vel an seng tawh tihna a ni. EPL hian squad-cost ratio rules (SCR) tih chu season hmasa aṭang khan an hmang ṭan a, club-te chu an sum lakluh aṭanga 85% chu player hlawh, agent fee etc-ah hman an phal - hemi dan ang chuan Spurs hian sum an la seng nual thei.

Ka lawm e

Italy international Tonali hian July 2023 khan AC Milan aṭangin Magpies hi £55mtd-in a zawm a, mahse, Magpies a zawm aṭanga rei vak lohah sum inthapna lama a lo inhnamhnawih avangin Italian Football Federation (FIGC) chuan thla 10 atan an hrem.

Mahse, hremna a zawh hnuah lo kirin, Magpies player pawimawh a ni a, kum 2025 khan kum 70 hnua an nomawi hmasa ber chawipuiin, Carabao Cup-ah a champion pui - tunah erawh a chhuahsan dawn ta.

Tonali chuan, "Magpies-a ka khelhpui leh staff te, ka chunga rinna in nghah avang leh min puih avangin lawmthu ka sawi e. Eddie Howe chungah a bik takin lawmthu ka sawi a, kawng min kawh hmuhin, kawng tinrengah min pui a ni," a ti a, Newcastle mipui chungah lawmthu a sawi bawk.