Darkar 5 leh minute 15 hnuah Djokovic a chak

Wimbledon quarterfinal-ah Novak Djokvic chuan Thawhlehni zan khan seeded no. 3 Felix Auger-Aliassime chu 7-6(12-10) 3-6 6-3 6-7(4-7) 7-6(10-4) in a hneh a, darkar nga leh minute 15 tehmeuh an inkhel a ni. Seeded no. 7 Djokovic hian July 10, Zirtawpni hian semifinal-ah world no. 1 Jannik Sinner a hmachhawn ang.

Wimbledon history-a quarterfinal khelh rei ber ṭum a ni a, Djokovic hian inelna zawnin vawi riat semifinal a lut. Serbian star hi kum 39 mi a nih tawh avangin a record hi a ropui lehzual a, Grand Slam semifinal hi vawi 55 a luhna niin Wimbledon semifinal vawi 15 a luhna a ni bawk.

Inkhelh zawhah Djokovic chuan, "Ka record a ropui a, mah se khati lam ngaihtuah hman ka ni lo. Ka tan chuan semifinal pakhat ve mai a ni a, ngai awh vat a, tun dinhmuna khawvel player ṭha ber hneh dan tur kawng ka zawn a ngai. Inkhelh ka chawlhsan hunah ka record hi chu ka la chhui kir ang," tiin inelnaah a rilru zawng zawng a pek thu a sawi.

Djokovic hi May 22, 1987 khan a piang a, kum 39 mi niin a khingpui Félix Auger-Aliassime hi August 8, 2000-a piang niin kum 25 mi chauh a ni thung. Player pahnih inthlauhna hi kum 13 leh ni 78 a ni a, a upa zawkin hnehna a chang.

Semifinal-a khingpui tur Sinner chuan, "Kum 14 mi vel lek ka nih lai khan Monte Carlo-ah a training ka hmu ṭhin a, ka thil tih theih tur ang tum ṭhin mi ka ni a, khatih hunlai pawh khan Djokovic ang hi ka ni dawn lo tih ka hre nghal. Wimbledon hi vawi tam a hmachhawn tawh a, khelh dan tur pawh a hria," tiin a fak a, chutihrualin Sinner hi vanglai hun hmang mek a nih avangin chak tura rinkai zawk a ni.