Fulham-ah Arbeloa a kal

Real Madrid coach hlui Alvaro Arbeloa chuan Premier League lam a hawi a, Marco Silva thlakin Fulham a enkawl dawn. Arbeloa hian kum thum daih contract a ziak a, seaosn thar aṭangin Fulham a enkawl ang.

Season liam ta khan Real-in Xabi Alonso an ban avangin Arbeloa hi a teammate hlui thlak turin an ruai a, Spanish full back hlui hnuaiah an khel ṭha nghal a, mahse season tawp lamah an zuih avangin nomawi chawi nei loa season kharin Arbeloa-a'n a chhuah tur thu a sawi a, a thlak nan an pu hlui Jose Mourinho an ruai.

Hetihlai hian Fulham chuan anmahni enkawltu Silva chu Mourinho thlak turin an ram club Benfica a pan a, kum nga hnuah Fulham a chhuahsan. Cottagers hi Tottenham Hotspur coach hlui Thomas Frank leh Ipswich Town coach hlui, Kieran McKenna te nen sawi zawm ni mah se Arbeloa nen an inrem ta zawk.

Kum 43 mi Arbeloa chuan, "Fulham hi Lomdon club zinga upa ber a nih avangin ka zawm thei hi kan tan chuan inchhuanna tham a ni a, he mawhphurhna lian tak chelh thei tura min rin avangin club hruaitute hnenah ka lawm em em a ni," a ti.

Fulham chairman Shahid Khan chuan, "Arbeloa hi mi tumruh tak a ni a, player langsar tak tak lo enkawl tawhtu a ni a, a tawnhriat ngahna hi kan club hian kan chhawr ngei ka beisei. Attacking football lama tui a nih bakah player naupang zawk khelhna hun a siamsak ṭhin avangin kan phur tawh hle," a ti.

Arbeloa hian Craven Cottage-ah Real-a a player zingah Franco Mastantuono, Fran Garcia leh Gonzalo Garcia te chu a hruai lut tel dawn nia sawi a awm a, palyer pathumte hian Fulham zawm kher lo mah se Santiago Bernasbeu an chhuahsan a rinawm.