Ṭhangthar Sinner hmaah hranghlui Djokovic

Wimbledon singles semifinal hnuhnung zawkah inkhel châkawm bik en tur a awm dawn. Zanin dar 7:40 hian seeded no. 2 Jannik Sinner leh seeded no. 7 Novak Djokovic te an inkhel dawn a, hemi hmaa Centre Court-a inkhel Alexander Zverev leh Arthur Fery te an inkhelh rei chuan inkhelh hun hi a tlai hret ang.

Covid 19 vangin kum 2020 khan inelna neih theih a ni lo a, khami zawh khan Djokovic hi kum zawnin a champion. Kum 2023 leh 2024-ah Carlos Alcaraz kum zawnin a champion leh a, nikum khan Sinner a champion. Hri leng hnua an champion chhoh dan thlir chuan Italian tennis star Sinner hun chiah a ni dawn a, mah se Djokovic paltlang a awlsam dawn lo.

Jannik a chungnung

Jannik Sinner leh Novak Djokovic te hi vawi 11 an inhmachhawn tawh a, Sinner hi vawi ruk chak tawhin Djokovic hi vawi nga a chak. Italian tennis star hi a zawn zatin vawi nga a chak chho a, mah se an intawn hnuhnun berah Djokovic hi a chak.

Kumin Australian Open semifinal-ah khan Djokovic hian kum lama naupang zawk Sinner hi 3-6, 6-3, 4-6, 6-4, 6-4 in an hneh a, hei hian inrintawkna nasa tak a pe ang. Chutihrualin grass-a an intawn hnuhnung berah Jannik a chak a, nikum Wimbledon semifinal-ah straight set-in a chak.

Engtin zel?

Jannik Sinner hi August 16, 2001 khan a piang a, Djokovic erawh May 22, 1987 khan a piang. Sinner a pian meuh chuan Djokovic hi kum 14, thla hnih leh ni 25 mi a ni tawh.

Djokovic hi kum 39 mi a nih tawh avangin a tha a ṭhum ve ṭan a, Sinner erawh kum 24 mi chauh a nih avangin a vanglai a la hmang chho dawn chauh.

Mahse, Djokovic hian semifinal-ah seeded no. 3 leh kum 25 mi Felix Auger Aliassime a hneh tih hriat a ṭha. Semifinal khelh hmain ni hnih chawlh a neih bawk avangin hahdamna hun a nei ṭha a, Sinner tan khelh a harsa dawn.

Inkhelh hunah hian London lamah chuan ni a la sa dawn a, Sinner hian khaw luma khelh a harsat. French Open-ah khan Sinner hian Francisco Cerundolo lakah 6-3, 6-2, 5-1 in hma a hruai hman a, khaw lum zawng 32°C a nih chhoh hnuah 3-6, 2-6, 7-5, 6-1, 6-1 in a chak lo daih.

Chutihrualin Sinner hi seeded no. 1 a nih avangin chak tura rinkai zawk a ni a, mah se Djokovic tan Roger Federer-a record nih ruala tura champion ngei a ngaih avangin hun ṭha bawhpelh a thiang lo. Inkhel hmuhnawm bik a beisei theih ang.