Chenna ngai loh ramah Alexander Zverev

Zanin dar 6:00 hian Wimbledon semifinal-ah Alexander Zverev-a'n British tlangval Arthur Fery a hmachhawn dawn. French Open champion Zverev hian kumin hian a vawi khat nan Wimbledon quarterfinal a invaw thleng a, semifinal hial a thlen tawh avangin nomawi chawi ngei a tum tawh ang.

Zverev hian semifinal thleng tur hian quarterfinal-ah a la hneh ngai loh seeded no. 6 Taylor Fritz chu straight set-in (6-4, 6-4, 6-2) in an hneh a, inrintawkna a ngah sawt dawn. Tun ṭum hi German tennis star-in Grand Slam semifinal vawi 12 a khelhna tur a ni.

Hnehna a chan zawhah Sascha (Zverev-a an kohna) chuan, "Cobolli a chak em?," tiin a zawt nghal a, mah se French Open final-a hneh Flavio Cobolli hi khawtual tlangval Fery lakah straight set-in a tlawm. Zverev chuan, "Entu mipui zawng zawngin Fery an ṭan dawn a, pawi tihna erawh ka nei lo. Ka tan hun ṭha inher chhuak se, midang zawng duhthusam erawh thleng lo se ka ti," tiin fiamthu pahin chak tuma theihtawp a chhuah tur thu a sawi.

Fery hi seeded nei pha lo a ni ringawt lo a, wildcard hmanga tel a ni. Inelna ṭan hmain ranking no. 114-na a ni chauh a, inelna zawhah chuan a hniam berah 36-na a ni pha dawn. Wimbledon hma zawng hian tennis aṭanga a sum lakluh chu $883,000 a ni a, inelna zawhah chuan a tlem berah $1,026,000 a hlawh chhuak ang.