Man United midfielder thar tur Santos

Manchester United chuan Chelsea aṭangin midfielder Andrey Santos chu maktaduai 50-in an lalut dawn. Club pahnih hian inremna an nei tawh a, he thu i chhiar meuh chuan engkim tihfel a ni tawh hial ang. Kum 22 mi Santos hian season thar aṭangin kawr pawl ni tawh loin kawr sen a ha tawh dawn.

Chelsea hian Santos manah pound maktaduai 48 an dawng phawt ang a, a khelh ṭhat dan a zirin United-in maktaduai hnih an pe leh ang. Hei bakah hian an hralh leh a nih chuan an hralhna man aṭanga 10% chu Blues hian chang ve turin inremna an siam bawk.

Man United hian veteran midfielder Casemiro contract an pawhsei sak lo a, Brazilian midfielder hian Inter Miami a pan dawn a, Old Trafford-ah a châm dawn lo. Hei bakah hian Paris St-Germain aṭanga an lak Manuel Ugarte-a'n beisei a pha lo a, hralh tum mah se World Cup a khelhnaah a khup a tihnat avangin tun nipuiah chuan a chhuah theih a beiseiawm loh.

Hetiang boruak karah hian Red Devils hian an buaina sut kian nan Nottingham Forest midfielder Elliot Anderson lakluh an tum a, mahse an ṭhenawm Manchester City chuan pound maktaduai 116 zeta an ngam avangin an beiseina a thamral zui. United hian Anderson an chân hnuah West Ham player Mateus Fernandes lamah an mit an len leh a, mahse ani pawh hi tun nipui transfer-a sum hmang na tak Tottenham-in an lak khalh leh a, a man hi pound maktaduai 85 a la ni hem mai. Italian midfielder Sandro Tonali pawh an lalut thei lo a, Spurs-in £100mtd bawr vel an seng ngam tlat.

United hian sum an theh chhuak tam ngam lo a, an player duh ber la loin an sum theh chhuah ngam tawka ṭha ber an la thung. Chelsea tana hmun pawimawh chang pha lo Santos lam an melh a, Blues lamin kum thum kal taa £18mtd bawr vela an lakluh player hi manto zawka chhuah an phal nghal. London club hi a lawm zawk an ni hial ang.

Santos hi Michael Carrick-a player lak luh pahnihna a ni a, World Cup ṭan hma lawk khan Atalanta aṭangin Brazilian midfielder tho, Ederson chu pound maktaduai 35-in a lo la tawh. Brazilian midfielder Ederson hian tun karah medical test a nei dawn.

Red Devils hian player dang an ngaihven zingah Aurelien Tchouameni pawh a tel a, Santos hi a hming a langsar lo hle. Mahse Brazilian midfielder hi Premier League-ah vawi 28 a inlan tling tawh a, league-ah tawnhriat a nei tawh. Kum 22 chauh a la nih avangin hmabak êng tak a nei a, Casemiro hmunruak luah khat a tum ang.

July 18-ah United hian Helsinki-ah Wrexham nen pre-season match hmasa ber an khel dawn a, Michael Carrick-a'n midfielder laia khel turin, senior player zingah Mason Mount chauh chhawr thei dawn.

Hetihlai hian Chelsea chu tun nipuiah player pathum an chhuahna tur chiah a ni a, Santos hma hian Marc Cucurella chu Real Madrid-ah hralh a ni tawh a, Tyrique George-a'n Everton a zawm bawk.