August-ah Pro Fight-a tel turte inziak lut dawn

LPS Pro Fight-a vawi 12-na buatsaih a ni leh dawn a, he inelnaa tel tum tan August chhungin entry form lak chhuah leh thehluh hun hawn a ni a, LPS Office, Zarkawtah August 2026 chhungin entry form pakhat Rs 10-in a lak chhuah theih a, August 31 ral hmain theh luh tur a ni bawk.

Rokhawlhna a awm avangin nikumah Pro Fight buatsaih a ni lo va, Boxing Gym intel khawm hruaitute leh boxer ṭhahnem ngaite ngenna ngai pawimawhin organising committee chuan 2024 hnua a vawi khat nan huaihawt turin thutlukna a siam.

Inelna hi September 8-ah LPS Arena, Falkland-ah ṭan a ni dawn a, September 4-ah tel turte zing dar 8:00 aṭangin LPS Arena-ah an inbuk ang a, September 7-ah fixture tar chhuah a ni bawk ang.

Pro Fight hnuhnung berah khan weight hrang pangaah boxer 286 telin, heng zinga pakua hi Mizoram pawn aṭanga tel an ni. Tun ṭumah pawh hian kum 17-40 inkar, Mizoram chhung leh pawn aṭangin a duh apiang tel theih a ni.

Championship hnuhnung berah flyweight title humhim turin NT Lalbiakkima a tel lo a, boxer 91-in a kalsan champion kawnghren inchuhin an zingah hian state pawn atangin mi pakhat a tel a, Tuipui tlangval Lalrinngheta a champion thung.

Bantamweight-ah mi 67 telin Ramthar Lunglei boxer Laldinsanga'n title a humhim a, state pawn atangin mi pahnih an tel. Lightweight-ah HC Lalramfela'n title a kawl lai kalsanin weight rit zawk welter-ah a insawn a, a kalsan champion kawnghren inchuha boxer 65 tel zingah state pawn atangin mi pahnih, Lalkhawngaiha, Venghlui a champion.

Welterweight-ah mi 37 an tel a, Tuipui boxer Lallawmawma'n Mission Veng tlangval Lalruatzela Hauzel kut atangin title a chhuhsak a. Middleweight-ah Manipur, Meghalaya leh Assam aṭangin boxer pakhat ṭheuh telin mi 23 an inlan a, F. Lalthanliana Jr, Lunglei Electric Veng chuan Chawngtlai boxer C. Lalhruaitluanga kut aṭangin title a chhuhsak.