Thilmak thlentirtu Fery a sang zel

Kar hmasa lawk khaa chuan Fery hian tennis inelna lianah second round a la pel ngai miah lo a, mahse Fery hian French Open pahnihna leh seeded no. 9 ni bawk bawk Cobolli chu rinkai loh zawk ni chungin a hneh.

British player hian Centre Court, mipui tam tak leh boruak sang takah world no. 10 chu 6-4 7-6 (7-4) 6-0 in a hneh a, semifinal invaw kaiin a vawi khat nan Wimbledon final lut turin kawng dik a zawh.

Kum 23 mi Fery hian hnehna a chan hnu lawkah a hlim avangin a tlu hnawp a, wildcard hmaga semifinal thleng thei hmasa ber niin, kum 25 hnua a vawi khat thlen lehna a ni. Goran Ivanisevic chiahin hetiang thil hi a la thi thei a, ani phei kha chu a champion hial.

Fery chuan, "Game hnuhnung berah khan ka nuna ka la tawn ngai loh hlimna nasa tak ka tawng a, ka coach te ṭhutna lam ka en khan keimah ang chiahin an awm ve niin ka hria. Ni hnih thum lo thleng turah hian eng nge ka tih dawn pawh ka la hre lo, hetiang dinhmunah hian ka la ding ngai lo a, kan hmachhawn chawp mai zel a niang chu," a ti.

Thawhṭanni khan Fery hian world no.3 pawh lo ni tawh Grigor Dimitrov a hneh a, amah ngei pawhin a awih lo hle. Mahse he a chakna avang hian Fery hian Italy tlangval Cobolli lakah zamna a nei lo a, inringtawk takin hnehna a chang thei.

Hnehna ropui chang mah se Fery hi lawm viau hman a la ni lo a, zaninah French Open champion Alexander Zverev nen semifinal-ah an inhmachhawn leh nghal dawn a, a hma aiin inbuatsaihna a neih ṭhat lehzual a ngai tawh ang.