TNT-in playoff khel dawn

Pro Volleyball League season hman zawh taka beisei pha lo Thutak Nunpuitu Team chuan, inelna sang bera tel zui zel turin Pro Division playoff an khelh a ngai dawn a, hmun ruak pahnih hnawh khat turin playoff an paltlang a ngai dawn.

PVL inkaihhruainaah mipa team pariat an tel thei ang tih a awm sa a, a vawi khat nan 2026-27 season atan Mizoram Volleyball Association (MVA) executive committee chuan season tharah mipa inelnaah team pariat tel turin thutlukna a siam.

Season liam taah mipa team pasarih inelin TNT an hniam ber a, a sang paruk - Hunthar, Khawbel, Anastasia Electric Veng, Chhinga Veng Spikers, Sihphir leh Tuichangralin PVL an khel zui thei dawn a, hmun ruak dang pahnih inchuhin TNT leh district team ṭhaten playoff an khel dawn.

District Association hnuaia season khat chhunga sang ber leh pahnihnain Pro Division playoff an khel thei a, mahse heng team te hian khelh an inhuam lo a nih chuan team dang inhuam an awm a nih chuan an district hruaitute hriatpuinain dil theihna kawng hawnsak a ni bawk.

Playoff hi nimin aṭang khan khelh ṭan a ni a, District Association hnuai aṭanga telte inelin a sang ber an tlang nghal ang a, pahnihna leh season liam ta Pro Division-a hniam ber TNT-in hmun ruak pakhat an inchuh leh ang.

Pro Division playoff-a tel tur team te hian season liam taa player an neih sa bakah Pro Division player ni lo pahnih theuh an lak belh thei a, hnam dang lâk erawh phal a ni lo. Player an lak thar turte hi District Association hriatpuinain an kalpui ngei tur a ni bawk.

Pro Division club-te tan playoff khelh zawh July 21-25 chhungin season thara an player te ziah luhna hun hawn a ni dawn a, hemi chhung hian district leh zone hnuaia club hrang hrang player te pawh an inziak lut ve nghal dawn a ni.