Hliamin Switzerland a tibuai

Kum 1954 hnua a vawi khat nan Switzerland-in World Cup quarterfinal an khel dawn a, an hmachhawn tur hi Lionel Messi telna, world champion Argentina an la ni zui - hmabak a ko hle.

Hetiang boruak karah hian Swiss team hi an ṭhat dan berin an la inlan thei dawn lo zui a, hliamin a tlakbuak avangin an buai ru - tun inelnaa hming chher tak Johan Manzambi inlan theih dawn leh dawn loh a la chiang lo.

Khup hliam vanga chawl mek Mazambi hian last 16-ah khan Swiss jersey hain khelmual a lut thei lo tawh a, tun inelnaa goal thum khung tawh midfielder hian bul a ṭan thei lo a nih chuan Switzerland tan chânna a tling ang.

Switzerland hian tlarhnung ven chu thupui bera nei chungin an khel dawn a, counter-ah Breel Embolo chu an innghahna tur a ni dawn. Mahse, Rennes forward hian Colombia lakah khan goal a khung lo a ni mai lo a, an penalty box-ah vawi khat chiah ball a tawk!

Swiss team tan Granit Xhaka chu player langsar tur a ni. Sunderland midfielder hian tun inelnaah final third-a line-breaking pass (50) a ngah ber a, Xhaka chet ṭhat dan hian an dinhmun tur thui tak a hril ang.