Wimbledon hmeichhe final-ah Czech nula pahnih Karolína Muchová vs Linda Nosková

Wimbledon hmeichhe final chu zanin hian Czech nula pahnih Karolína Muchová leh Linda Nosková ten an khel dawn a, la champion ngai lo pahnih inkhel a nih dawn avangin champion thar an awm ang. Inkhelh hun hi an inkhelh hmaa inkhelte khelh rei zawngah a innghat a, zanin dar 8:30 vela inkhel ṭan tura ngaih a ni.

Seeded no. 9 Nosková hian final lut turin semifinal-ah seeded no. 12 Marta Kostyuk chu 6-4, 6-4 in an hneh a, seeded no. 10 Karolína Muchová pawhin amah aia seeded sang Coco Gauff chu 6-2, 1-6, 7-6 (12-10) in a hneh hram bawk.

Tu nge Noskova?

Kum 21 mi Noskova hi Czech rama thingtlang khaw pakhat Bystricka-ah November 17, 2004 khan a piang a, kum sarihin a nihin semifinal a khel ṭan a, tennis khelh a duh vang liau liauin kum 2018 khan Prerov-ah an pem.

French Open 2021 khan girls singles-ah a champion a, June 2021-ah Noskova hi ITF junior rankings-ah pangana a ni pha hial. Chhungkaw hausa aṭanga seilian a ni lo a, a pa hi Czech railway company-ah thawkin a nu hian thawmhnaw zawrhna dawr a nei thung.

Serena Williams ngaisangtu Noskova hian tennis a ngaihnat hmain wrestling lamah a tui a, mahse tennis lam a luhchilh hnuah hma a sawn chak hle. Chutihrualin khawvel hriat a hlawh chhoh velah July 2024 khan cancer natna vagnin a nu a thi a, a tuar hle. Court pawh lamah a chet dan a tlangzarh lo a, tennis tan bika a inserh hran rah a seng chho mek.

Tu nge Muchová?

Karolína Muchová hi Noskova aiin a u deuh hret a, August 21, 1996 khan Olomouc, Czech Republic-ah a piang. A pa Josef Mucha hi professional footballer hlui a ni a, kum 58 mi ni tawhin Czech club Zbrojovka Brno-ah assistant coach hna a thawk mek.

Mucha hian a fanu Muchova hi tennis a hmelhriat tir a, an in bul hnaiah tennis court a awm bawk avangin inelna hi a ngaina hma a, kum 12 a nihin handball aiah tennis khelh a thlang.

Tennis-a insawrbing a duh avangin Muchova hian kum 2019 khan Prague-ah a insawn a, amah hi Roger Federer ngaisangtu a ni. A naupan laiin hliamin a tlakbuak nasa a, tumruhna hmanga harsatna patlangin hmeichhe tennis player ṭha ber pawl a ni chho mek.

Kum 29 mi Muchova hian Grand Slam la champion lo mah se French Open-ah kum 2023 khan final a lut tawh a, US Open-ah ṭum hnih (2023 leh 2024) semifinal a lut a, Australian Open-ah 2021 khan semifinal a lut tawh bawk.

Final chu

Czech nula pahnih Karolína Muchová leh Linda Nosková te hi hnam khat an ni ringawt lo a, ṭhian inkawmngheih tak an ni. Paris 2024 Olympic Games-ah pawh hian player pahnih hi doubles-ah an inkawp a, first round-ah rinkai ni pha American duo Coco Gauff leh Jessica Pegula te an hneh hial.

Semifinal-ah gold la zui ta Italy aiawh Sara Errani leh Jasmine Paolini te an hneh lo a, bronze medal inchuhnaah Spain aiawh Cristina Bucșa leh Sara Sorribes Tormo lakah an vanduai leh bawk.

Noskova hian 2023 French Open final-a Muchova leh Iga Swiatek te an inhmachhawn ṭum pawhin court sir aṭangin a ṭhiannu hi a ṭawiawm a, zaninah erawh centre court-ah an inhmachhawn dawn.

Czech nula pahnih hi ṭum khat chauh an la inhmachhawn a, US Open 2025 khan third round-ah Muchova hian Noskova hi 6-7, 6-4, 6-2 in an hneh a ni.