Man United-in stadium thar ruahmanna tarlang

Manchester United chuan an stadium thar tur chungchang chipchiar zawkin an puangzar a, Old Trafford aṭanga hmarh thlang lam metre 350-ah a ding dawn a, ṭhutna 100,000 lenna turin an ruahman

Stadium thar project hian hna 48,000 a siam thei dawn a, in thar 15,000 awm belhin UK economy tan kum khatah pound vaibelchhe 7.3 vel a la lut thei dawn bawk niin United stadium thar sak na tura an CEO, Collette Roche chuan a sawi.

Roche chuan, "Kan thawhpuite nen hian khawtlang leh tualchhung bakah, chhuan lo la awm leh zel turte tana hlawkna thlen thei tur siam kan tum dawn. Kan project-ah hian club ṭantute supporter te tana stadium ṭha chungchuang sak ngei kan tum bawk," a ti.

United neitu zinga mi Jim Ratcliffe chuan khawvela football stadium ropui ber din chu a thupuiah a lo nei tawh a, nikum lama ruahmanna an phochhuah hmasak ber khan Wembley stadium aia lian zawk, UK-a lian ber ni tura stadium sak nan hian pound vaibelchhe hnih vel sen a ngaih rin a ni a, 2030-31 season hma ngeia zawh hman beisei a ni bawk.

Tun thlengin Wembley hi UK-a stadium lian ber a la ni a, England national football team ten an khelmual atan hmangin mi 90,000 an leng. Tottenham Hotspur pawhin an stadium sak laiin home match khelh nan Wembley Stadium hi an lo hmang tawh.

Club stadium-ah erawh Old Trafford hi England ram chhunga lian ber a ni thung a, mi 74,000 chuang an leng. Mahse indopui pahnihna lai khan bomb hmanga tihchhiat a lo ni tawh a, stadium dang nen khaikhin chuan a hlui tawh tih phat rual a ni lo.

Hetihlai hian Man United hian vaibelchhe 1.3 chuang zet ba an la nei a, hemi vang hian Arsenal leh Emirates bakah Manchester City leh Etihad ten an stadium thar atana an lo inrempui tawh ang khan hming thar an put a ngaih hmel hle.