Pathianni zanah Wimbledon mipa final

Tennis inelna ngaihhlut ber zinga mi Wimbledon mipa final chu July 12, Pathianni zan dar 6:30 hian Centre Court, London-ah khelh a ni dawn. Nizan khan mipa semifinal khelh a nih chauh avangin final inhmachhawn tur kan hre hman lo.

Seeded no. 1 Jannik Sinner leh seeded no. 2 Alexander Zverev ten semifinal an invaw thleng a, final-ah inhmachhawn se 'dream final' a ni thei ang. Chutihrualin Novak Djokovic-a'n final a lut a nih pawhin Roger Federer-a record a nihrual theih avangin nomawi inchuhna hlu bik a ni dawn. Federer hian Wimbledon mipa singles-ah vawi riat a champion a, Djokovic hian vawi khat chauhin a pha lo.

Semifinal khel zinga langsar lo ber Arthur Fery hi dah hniam ngawt a rem lo a, British tlangval hian chanchin ngaihnawm tak a nei. Kum 23 mi Fery hi Wimbledon, London-a piang a ni a, tun ṭumah hian wild card hmanga telin Grand Slam-a a thlen san ber a ni.

Wimbledon bikah Goran Ivanisevic (2021) dawta wild card hmanga tel zinga semifinal thleng leh hmasa ber a ni a, khawtual tlangval a nih bawk avangin ṭan a hlawh dawn. Ivanisevic khan nomawi a chawi a, mah se Croatian star kha chu sulhnu ṭha a neih vanga wild card an pek a ni. Fery erawh khawtual tlangval a nih avanga wild card nei pha a ni thung.