Mizoram Pool inelnaah tel an tam

Sihphir Town Billiards Association chuan a vawi hnih nan inelna an buatsaih dawn a, Manuna Memorial Mizoram 10 Ball Pool Championship-a tel turin cue player 84-in hming an pe lut a, inelna hi Sihphir leh Sihphir Venghlunah July 13 aṭanga 18 chhungin khelh a ni ang.

Mizoram pool inelna lianah hian Mizo player ṭhate an ṭhahnem dawn a, pawisa fai cheng nuai khat sem chhuah a ni ang. Pool hrang pariatah player te hi ṭhen hran an ni dawn a, a tir ni li chhung pool league khelin pool tin aṭangin mi pahnih ṭheuhin round of 16 an lut dawn a, July 19, Inrinniah final khelh a ni ang.

Nikum khan Sihphir Town Billiards Association-in hlawhtling takin CK Hyundai 9 Ball Pool championship an buatsaihah a, final-ah T. Laltlansanga'n Zothantluanga hnehin a champion. Lunglei ball hawlh thiam Tlansanga hian nomawi humhim tumin tun ṭumah pawh a inlan dawn.

Mizo player ṭha ber zinga mi Lalrina Renthlei leh Lalsangzela an tel dawn bawk. Anni pahnih hi Mizoram Snooker and Billiards Association-in championship a buatsaih hnuhnung vawi hnihah final lut ve vein ṭum khat ve ve an chak.