Neymar-a hma hun a chiang lo

FIFA World Cup 2026 aṭanga Brazil an tlak hnuah Neymar Jr. chuan professional football zinkawng tihtawp a ngaihtuah nia sawi a awm a, Brazil chanchinbu ṭhenkhat tarlan danin Barcelona forward hlui hian inkhelh a chawlhsan zui mai thei niin an sawi.

Kum 34 mi Neymar hian Norway an hneh loh hnu lawk khan international football a chawlhsan thu a lo puang tawh a, Brazil kawr hain khelmuala inlan tawh lo turin thlutlukna a siam fel tawh.

Neymar hian kumin kum tawp thleng Santos FC-ah contract a la nei a, duhthlan tur ngah hle mah se inkhelh chawlhsan a rilruk nia sawi a tam avangin a hma hun a chiang lo. Neymar-a pa chuan social media-ah, "Ka ngenna che chu, Ney, khawngaihin football hi khelh chhunzawm hram rawh," tiin a sawi thung a, a fapa chu inkhelh chhunzawm zel turin a la duh.

Kumin May thlaah khan Brazil head coach Carlo Ancelotti chuan, World Cup khel turin Neymar hi a ko a, mahse hliam vangin he tournament-ah hian vawi hnih chiah a inlan thei a, vawi khat mah bul a ṭan lo.

Brazil-in 3-0 a Scotland an hneh ṭumin hun tawp dawnah bench aṭangin a lut a, round of 16-ah Norway laka 1-2 a an tlawm ṭumin a tawp minute 30 a khel a, penalty hmangin goal khat khung mah se a team a chakpui zo lo.

Neymar hian Brazil tan goal 80 khungin ram tana goal khung tam ber a ni a, assist vawi 59 a nei bawk. Hetiang zat nei thei tur hian match 130 a mamawh a, Brazilian zingah Pele hnua World Cup vawi lia goal khung thei awmchhun a ni bawk.