Pulisic a chawl rih dawn

Kumin World Cup thlengtu zinga langsar ber USA forward Christian Pulisic-a hliam chu endik a nih hnuah a ke ruh tenau a tliak tih hmuhchhuah a ni a, kar thum aṭanga kar ruk tal a chawlh a ngai dawn niin US Soccer Federation chuan an tarlang.

Kum 27 mi Pulisic hi round of 16-a Belgium nen an inhmachhawn ṭum khan, ball pet a tumna lamah Belgium captain Youri Tielemans-a ke hnung lam a pet palh a, a ke ding lamah hliam tuarin minute 59-naah thlak a ni zui nghal.

A hliam nat hi X-ray leh MRI scan hmanga endik a ni a, AC Milan forward hi a chawlh rih a ngai dawn. Pulisic chuan, "Ṭum khatah ka kerek leh ka khup ka tina a, tunah rih chuan ka chawlh hahdam a ngai dawn. Hetianga World Cup kan mangṭha mai hi pawi ka ti hle a ni," a ti.

Borussia Dortmund forward hlui hi World Cup khelh mekah an ram innghahna a ni phak a, goal khung lo mah se an goal bawh tinatu a ni. Pulisic hi chawlh rih dawn mah se season thar atana Milan match hmasa ber an khelh hunah a inlan thei dawn a, August 23 hian Torino nen an inhmachhawn dawn.