Wimbledon hmeichhe champion Noskova

Grand Slam inelna ngaihhlut Wimbledon hmeichhe final-ah Czech nula pahnih Linda Nosková leh Karolína Muchová te an inhmachhawn a, ṭhian dun pahnih inkhelah kum lama naupang zawk Noskova-i'n 6-2, 5-7, 6-3 in hnehna a chang.

Finalist-te hi Wimbledon-a la champion ngai lo ve ve an ni a, nomawi duhin an tuihal. Tun hnaia che ṭha zawk Noskova-i'n bul a ṭan ṭha a, seeded no. 9 hian set hmasa ber 6-2 a lak bakah set hnihnaah pawh 5-2 in hma a hruai hman.

Mahse, seeded no. 10 Muchova-i'n set hnihna hi 7-5 in a rawn la a, Centre Court-a entu mi 15,000 tan chuan hmuhnawm a tling. Deciding set khelh a ṭul a, Muchova chu chak tura dinhmun ṭha zawkah a ngaih theih hial.

Kum 29 mi Muchova hian Grand Slam final a khel tawh a, 2023 French Open khan final-ah vanduai. Mahse, final boruak sangah kum naupang zawk Noskova a insiamrem hmasa zawk a, set hnihnaah championship point ṭum thum a hmang ṭangkai lo a, ṭum hnih dang nei lehin a hun ṭha neih hi a bawhpelh leh tho.

Noskova-i'n pressure a ngah ta zawk a, mah se set thumnaah a insiamṭhat hei tlat. Championship point hmasa ber a bawhpelh aṭanga darkar khat hnuah chakna chance a nei leh a, a hmang ṭangkai ta. Set thumna hi Noskova hian 6-3 in a la a, a vawi khat nan Wimbledon nomawi a chawi.

Wimbeldon-ah hian tun hnaiah Czech player an che ṭha thei hle. Kum 2023 khan Marketa Vondrousova a champion a, kum 2024-ah Barbora Krejcikova-i'n nomawi a chawi leh bawk. Noskova hi kum li chhunga Czech player champion thei pathumna a ni.

Czech nula pahnih final hi Czechoslovakia-a piang tennis player ropui Martina Navratilova pawhin a hmunah a en a, ani hian Grand Slam singles vawi 18 a champion a, chung zinga vawi kua chu Wimbledon-ah a ni. Navratilova bakah hian 2011 leh 2014 champion Petra Kvitova-i'n a hmunah en bawk.

Noskova hian nomawi ngaihhlut Venus Rosewater Dish a chawi ta a, sum faiin £3.6mtd a la a, world ranking-ah pasarihnaah an invawrh chho ang. Inkhelh banah Noskova chuan, "Ka inkhelh en turin ka pa a rawn tel a, thlawhtheihna chuang ngai loin min ngaih pawimawh vangin thlawhtheihnaah a rawn chuang a, ka ngai hlu hle. Ka nu chungah lawmthu ka sawi duh a, ani tel lo chuan tun hun hi ka thleng lo ang," tiin a sawi.

Noskova hian a thusawi zawh hian van lam hawiin 'flying kiss' a pe a, mipuiin standing ovation an pe. A nu Ivana hi kum hnih liam ta khan Wimbledon inelna ṭan hma chiahin a thi a ni.