Spain chhan chhuaktu Merino bawk

FIFA World Cup-ah Spain-in Lamine Yamal hoin an tho chhuak a, Barcelona star hi langsar viau mah se Belgium lakah pawh Portugal lama chakna goal khungtu Mikel Merino bawkin chakna goal a khung. Arsenal forward hian tun World Cup-ah hming a chher a, knockout stage china bench aṭanga luta chakna goal ṭum hnih khung thei hmasa ber a ni.

Los Angeles Stadium-ah Fabian Ruiz hmangin Spain-in goal khung hmasa mah se Belgium-in Charles De Ketelaere hmangin first half-ah vek an sut. A tawpah La Roja an vannei zawk a, goalkeeper Senne Lammens tihsual vangin substitute Merino-a'n chakna goal a khung.

Pedri leh Tielemans tel lo

Spain manager Luis de la Fuente-a'n Pedri bul a ṭantir lo. Barcelona midfielder hi a dam ṭha vek a, mah se a khelh ṭhat tawk loh avangin Fabián Ruiz-a'n bul a ṭan zawk. Pedri hi club leh ram tana a dam ṭha vek chunga bench-a a awm vawi khatna a ni.

Belgium lamin bul ṭantu zingah captain Youri Tielemans an tel vek a, mah se Aston Villa midfielder hi warm up-naah a inhliam avangin inlan thei lo. Red Devils coach Rudi Garcia-a'n loh theih loin Tielemans aiah Hans Vanaken a luhtir.

1-1 phawt

Belgium-in nung takin inkhel bul an ṭan a, Spain tlarhnunga ball inpe kual thlengin an nawr ngam. Mahse, an inkhel chho a, thahrui ngah Jeremy Doku aiah thluak ṭha Lamine Yamal a chungnung zawk.

Minute 30-naah Pedro Porro cross chu Dani Olmo-a'n goal-ah pet nghalin keeper Thibaut Courtois-a'n dang mah se a per chu Fabian Ruiz-a'n a hlah lo. Courtois a che ṭha a, Yamal-a freekick pet ṭha takin a dang.

First half tawp dawn hnaiah Belgium an rawn lang a, Kevin de Bruyne pass ṭha changtu Timothy Castagne-a'n cross ball ṭha dah lutin De Ketelaere-a'n ṭha zetin a tauh lut. First half-ah 1-1 a ni a, inkhel a nung thar sawt.

Inhliam leh Merino

Second half-ah inkhel a nung chhunzawm a, Belgium-in KDB hmangin chance ṭha an nei hmasa zawk. Spain pawhin chance ṭha insiam mah se Courtois an paltlang thei lo.

Mahse, keeper che ṭha Courtois a inhliam a, minute 70-naah Senne Lemmens a luh a ngaih phah. Manchester United goalkeeper hi tun inelnaa a vawi khat inlan a ni a, minute 88-naah a chesual.

Box pawn aṭanga Pau Cubarsí ball pet chu Lammens-a'n hmun hlauhawm laiah a nam per thei lo a, substitute Merino rawn lang hmasa berin chiang zetin a pet goal. Merino hian an a pa Angel Merino goal khung lawm dan ṭhin angin corner flag vir khumin a goal khung a lawm. Spain tan Merino goal khung hi semifinal luh nan a tawk.