World Cup-ah dream semifinal

Kumin FIFA World Cup-ah a vawi khat nan seeded team pali an awm a, nikum kum tawpa draw an neih laia FIFA ranking-a a sang pali Argentina, France, Spain leh England ten semifinal an lut vek.

Draw neih hma khan Spain hi ranking-ah no. 1 an ni a, Argentina (2), France (3) leh England (4) ten an dawt. Seeded hi ranking ang hian siam a ni. Seeded sang pahnih hi final-ah bak inhmachhawn thei tura duan a ni a, chutihrualin fixtures pawh dan a zirin seeded no. 1 hian semifinal-ah France emaw England emaw a hmachhawn thei thung.

Seeded no. 1 Spain-in semifinal-ah seeded no. 3 France an hmachhawn dawn a, seeded no. 2 Argentina leh seeded no. 4 England te an inkhel bawk dawn. Ram pali hi champion tawh vek an ni a; Spain, Argentina leh France te kum 2010 leh a hnu lama nomawi an chawi laiin England erawh kum 60 liam ta khan nomawi an chawi a, hemi hnu hian an chawi leh tawh lo.

FIFA ranking thar berah pawh tuna semifinal lut ramte tho hi a sang paliah an awm. France a chung berah an awm a, an hnuaiah Argentina (2), Spain (3) leh England (4) te an awm a ni.