TNT leh 08 Spikers ten Playoff an paltlang

Mizoram Pro Volleyball League khel tur zawnna Pro Division Playoff-ah, Mamit team 08 Spikers chuan playoff paltlangin a vawi khat nan Mizorama volleyball inelna sang berah an inlan dawn.

Anni bakah hian Thutak Nunpuitu Team te chuan PVL khel chhunzawm zel turin an chak ve bawk a, season liam ta PVL mipa team pasarih zinga hniam ber TNT-in tla hniam thei dinhmuna ding chungin Doris Memorial an hneh a, inelna sangah an inlan chhunzawm dawn.

Hello 08

District hrang hrang aṭangin Mamit team pahnih LC Club leh 08 Spikers bakah Aizawl district champion Doris Memorial-in playoff khelh an inhuam a, team pathumte hi Luangmual YMA Hall, Aizawlah an inel.

ITI Veng club Dorris Memorial laka set hmasa pahnih an hloh hnuah 08 Spikers-in hnehna an chang a, 26-28, 23-25, 25-17, 25-16, 15-10-in an chak. A hnuah Mamit district team pahnih inkhelin set nganaah vawi ruk an deuce hnuah 08 Spikers an tlang a, 25-23, 23-25, 25-23, 27-29, 21-19-in LC Club an hneh.

Harsa taka an elpui team pahnih an hneh zawn rualin 08 Spikers an tling a. Doris Memorial-in set li an inkhelh hnuah 25-20, 25-21, 22-25, 25-19-in LC Club an hneh ve leh a, tlang nghal zo lo mah se TNT an hneh chuan chance an la nei.

TNT nge nge

Playoff ni hnihnaah Doris Memorial-in TNT hmachhawnin set hmasa pahnih an lak hnuah harsatna an tawk a, inelna sanga tawnhriat an neih chu TNT danglamna a ni a, TNT hian set thum la zawnin 20-25, 17-25, 25-21, 25-12, 15-9-in an chak.

Kum 2016-a Pro Division kalpui a nih atangin a vawi khat nan division hniamah TNT an tla teuh hle a, hmun ruak hnuhnung ber luah hramin 2026-27 season-ah team pariat - Hunthar, Khawbel, Anastasia Electric Veng, Chhinga Veng Spikers, Sihphir, Tuichangral, 08 Spikers leh TNT an inel dawn.

Season tharah chuan TNT-in a hma aia ṭhaa khelh an duh tawh dawn a, chesual nawn tawh lo turin season ṭan hma aṭangin ṭan an lak a ngai tawh ang.