United-in Ederson duh leh lo?

Manchester United-in Serie A club Atalanta aṭanga midfielder lakluh an tum, Ederson-a chu a khup hliam vangin an duh leh lo niin Fabrizio Romano chuan a tarlang a, khawthlang chanchinbu ṭhenkhat phei chuan an indawrna leh inbiakna an tihtawp vek thu an sawi hial.

United hian June 2 khan Brazilian midfielder manah pound maktaduai 35 an pawm tawh a, July thla tir khan Ederson-a hian medical neiin, pre-season training ṭan hmain transfer hi tihfel hman an tum.

Mahse kum 27 mi Ederson hi Carlo Ancelotti-a'n World Cup khel turin a koh leh hnuhnawh a, United a zawm hun tihkhawtlai a ni a, Brazil an tlak rualin Ederson hian medical test nei nghal tura ruahman a ni.

Brazil-in Norway hneh loa an tlak hnuah Red Devils hian Ederson hi a khup hliam vangin an iai leh deuh nia sawi a awm a, Chelsea aṭanga Andrey Santos la lut tura an inrem tawh bakah AS Roma midfielder, Manu Kone an ngaihven avangin an Ederson an hawisan.

Hetiang a nih lai hian, club pahnihte lama thudawnte erawh chuan chu chu a dik lo tih an sawi a, transfer chungchangah hian eng thutlukna mah a la awm lo tih an sawi thung. Ederson-a hi tunah hian United States-ah a la awm rih nia sawi a ni.

Champions League an khelh tawh dawn avangin Michael Carrick-a'n midfield thuam chak a tum a, veteran midfielder Casemiro thlakna tur zawng mekin Ederson leh Santos te hi hming nei lian ber an ni. Hei bakah hian Leeds United keeper Karl Darlow nen an inhnaih tawh viau bawk.