France chakna thahrui - inlungrualna!
World Cup ṭan hma hauhin mi tam zawkin champion turin France an ring a, an squad enin thil awm lo pawh a ni hran lo. Kil tinah world class player an awm, tia sawi theih a ni a, mahse, chung zawng zawng kara an chakna ber erawh 'inlungrualna' tia sawi theih a ni.
Les Bleus hian star rual player an nei chungin inlungrual takin an inkhel ho thei a, an induhsak tawn vek - hetiang taka star player rual, inlungrual taka khel ho tura siam thei coach Didier Deschamps-a'n fak a phu takzet.
France hian tlarhmaah Ousmane Dembele, Michael Olise, Desire Doue leh Kylian Mbappe te chhawr tur an nei a, tun World Cup-a goal khat chiah la chhuahtu Spain hian an dang thei ang em? tih chu rilrua zawhna awm a ni.
La Roja hian tlarhnung laiah Pau Cubarsi leh Aymeric Laporte an nei a, an hma chiahah anmahni pui tura Rodri a din ṭhin bawk avangin an nghet hle - France tlarhmaa world class player rualin an enchhin tur hi hmuh châkawm a tling.
Deschamps-a'n a hman thiam sa, 4-2-3-1 hmang bawkin Spain a hmachhawn a rinawm a, tlarhmaah player a thlak danglam chiam a rinawm lo - a thlak a nih pawhin Doue aiah Bradley Barcola a lut ang a, a bak chu a pangngai a ni ang.
Goalkeeper Mike Maignan hian a hmaa dingte ṭhat luatah, fiahna tak tak a la hmachhawn lo em aw, a tih theih a, zaninah erawh Spain-in AC Milan keeper ṭhat tawk leh tawk loh an enchhin fo dawn tih a chiang.
Tlarhnung laiah William Saliba leh Dayot Upamecano te an inkawp leh dawn avangin an nghet ang tih a chiang a, tlarhmaa an player palite duhthala an leu theih nan Adrien Rabiot leh Aurelien Tchouameni ten defensive midfield hna an thawk leh ang.
Real Madrid midfielder Tchouameni hian hliam vangin round of 16 leh quarterfinal match a khel lo tawh a, Spain lakah a la dam chiang lo a nih chuan a awm loh laia a hmun ruak luahtu Manu Koné bawkin bul a ṭan leh a rinawm.
France hian fullback-a ding turin Jules Kounde leh Lucas Digne an nei a, player pahnih hi Les Bleus panna lai bera chhal theih an ni - Lamine Yamal leh Alex Baena te an hmachhawn tawh dawn a, an match hmasa aṭanga teh chi a ni lo ang.