Tu nge Jannik Sinner?

World no. 1 Jannik Sinner hi August 16, 2001 khan Innichen, Italy-ah a piang a, kum thum mi lek a nih laiin vurah a tawlh tawh. Kum li mi a nihin awm ze neiin vur tawlh a zir tawh a, a huaisen bakah a balance a ṭhat avangin hmabak pawh a nei êng viaua ngaih a ni.

Kum nga a nihin a pa Hanspeter-a'n tennis a hmelhriattir ṭan a, mah se Jannik hian a tirah tennis hi a ngaina nghal lo. Vura tawlh bakah ṭhiante nena football khelh chu tennis aiin nuam a ti zawk.

Vur tawlh nuam a tih zawk avangin vur tawlh lam a buaipui nasa zawk a, kum sarih a nihin Italy ram pum huap inelna Trofeo Topolino-ah kum 2008 khan pakhatna a ni a, kum 12 a nih thlengin vur tawlh lamah hian kalin ram pum huap inelna (U12) ah pawh pahnihna a ni hman bawk.

Kum sarihin a nihin tennis lamah a kir leh a, a pain tualchung tennis coach Heribert Mayr bulah a zir tir a, hetah pawh hian nuam tih vanga khel chauh niin kar khatah vawi hnih chauh a la training.

Sinner hian kum 13 a nihin football leh vur tawlh kalsanin tennis-ah a insawrbing a, coach lar tak Riccardo Piatti hnuaiah a zir chho bawk. Kum 14 a nihin tennis-a a thiam tipung turin a chhungte bula cheng tawh loin tennis zir turin Bordighera-a Piatti Tennis Center a zawm.

Kum 16 a nihin professional player nih tumten an khelh ṭhin ITF Futures tournament a khel ṭan a, kum 2018 zawh khan world ranking-ah 551-na a ni. Sinner hmasawnna hi kum 17 a nih aṭangin a zuanin a zuang a, February 2019 khan ranking-ah 546 ni mah se Bergamo Challenger-ah wild card hmanga telin a champion.

Kum 2001-a piang zinga Challenger tournament-a champion hmasa ber a ni a, hemi kum hian Challenger tournament-ah vawi hnih a champion leh bawk. Kum 2019 khan Milan-a Next Gen ATP Finals-ah world no. 18 Alex de Minaur chu a sawp a, khawvel player ṭha ber ni turin theihna a nei tih a chiang ta.

Sinner hi kum 24 mi lek ni mah se Grand Slam-ah vawi ruk a champion der tawh a; Wimbledon (2025, 2026) leh Australian Open (2024, 2025)-ah vawi hnih ve ve champion tawhin French Open (2025) leh US Open-ah (2024) a champion tawh bawk.