Man United-in Belgium captain la dawn

Manchester United chuan Aston Villa aṭangin Youri Tielemans an lalut dawn a, tunkar chho hian Belgium captain hian medical a nei ang.

Aston Villa-a kum 29 mi Tielemans-a release clause hi €41mtd a ni a, Manchester United chuan a release clause ang hian an la chhuak dawn. Man United hian Belgian midfielder nen hian mimal contract chungchangah a thuphungin inremna an nei tawh bawk.

Michael Carrick-a hoa khel tur Manchester United hian Casemiro an chhuah bakah Manuel Ugarte inhliam avangin midfielder an mamawh a, nipui bazarah pawh hna hmasa berah an nei nghal.

English club hian Atalanta aṭangin Ederson la lut turin hma an la nghal a, Brazilian midfielder hi World Cup khel tura koh leh hnuhnawh a nih avangin medical an nei lawk lo. Carlo Ancelotti hote World Cup aṭanga an tlak hnuah medical hi neih a ni a, a patlang zo lo niin khawtlang media ten an tarlang.

Man United player lak tum dang Elliot Anderson-a'n Nottingham Forest aṭangin £116mtd-in Manchester City a zawm ta zawk. Mateus Fernandes (£85m) leh Sandro Tonali (£100m) ten Tottenham Hotspur an pan bawk.

Red Devils-in man to uchuak taka sum hman an tum lo a, Chelsea aṭangin £50mtd-in Andrey Santos an lalut. Kum 22 mi Andrey Santos hi a kum aṭanga tehin a man hi phu mah se a theihna aṭanga teh erawh chuan a tlawm hran lo. Season hman zawh takah khan Premier League-ah match 28-ah inlanin goal khat a khung a, assist a nei lo.

Man United-in tawnhriat nei ṭha bik midfielder Casemiro an hralh avangin tawnhriat nei ṭha an mamawh a, kum 29 mi Tielemans an chang hi an vannei hle. Belgian midielder hian ram tan match 90 a khel tawh a, goal 15 a khung. Premier League-ah pawh tawnhriat ṭha tak a nei a, Leicester City-ah hming chherin Aston Villa a pan a, Villa tan season thum chhungin match 93-ah inlanin goal nga khung.