Italy Technical Director thar Maldini

AC Milan leh Italy legend Paolo Maldini chu Italian Football Federation (FIGC) Technical Director atan ruat a ni a, Italy hian football-a an ram dinhmun chhe tak siamṭhaa, indinthar leh an tumnaa an hmalakna pakhat a ni.

Kum 58 mi Maldini hian Italy tan vawi 126 lai a khel tawh a, club lamah AC Milan tan a hun puma hmang zo a, a chawlh hnuah 2019 aṭanga 2023 khan Milan-ah vek hian technical director hna a lo chelh tawh bawk. 2021-22 season-a Serie A a champion lehna atana mi pawimawh a ni.

Technical director-a Maldini ruat hi Giovanni Malago-a'n thla hmasa a, FIGC president hna a chan hnu lawka a rawt chhuah a ni a, Malago hi kumin February thlaa neih tak Milano Cortina Winter Olympics buaipuitu committee-ah ho tu a lo ni tawh bawk. President thar Malago hian Gabriele Gravina a thlak a, Gravina hi April thlaa Azzurri-in World Cup an tlin loh hnu lawk khan a hna aṭang hian a bang.

FIGC chuan Leonardo chu a hmaa Maldini thawhpui turin an ruai nghal bawk a, Brazilian footballer hlui hi Milan-ah Maldini nen an lo khel dun tawh. Italian chanchinbute tarlan danin, Maldini hian kum 2028 thleng daih tur contract a ziak a, Milan a thuam ṭhat ang bawka an ram team kai tho leh turin an beisei dawn.

Italian legend hna hmasa tur chu coach thar rawih a ni dawn a, an coach hlui Antonio Conte leh Roberto Mancini te hming ri mah se Maldini-a'n a duh lo nia sawi a awm a, Manchester City chhuahsantu Pep Guardiola hming a ri ring hle. Hetihlai hian Andrea Pirlo leh Brazil coach Carlo Ancelotti te hming pawh a ri tel bawk.