Garnacho-a'n training a zawm lo

Chelsea winger Alejandro Garnacho chu pre-season training an neih hmasak berah hmuh tur a awm lo a, Argentine winger hian Manchester United aṭanga Stamford Bridge a zawm hnuah kum khat chauh a la ral tihin, club chhuahsan a dil mek niin khawthlang chanchinbuten an tarlang.

Old Trafford aṭanga pound maktaduai 40 zeta Blues a zawm hnuah Garnacho hian beisei a phâk lo a, season hmasa khan Premier League-ah match 14-ah chiah bul ṭanin goal khat chauh a khung bawk. Kum sarih chhung daih tur contract ziahpui ni mah se kum khat hnu lawkah a chhuah leh nghal hmel hle.

London club hi manager thar Xabi Alonso hnuaiah an khel tawh dawn a, July 25 hian Australia-ah pre-season tour an neih dawn. Hetihlai hian Garnacho hian regular taka hmun a chan theihna tur club thar zawngin a kal ve dawn lo nia sawi a tam hle.

Hetihlai hian Garnacho hian amah duhtu a tlachham lo a, Europa League champion Aston Villa nen saawizawm ni mekin Italian club lian AS Roma chuan an ngaihven bawk. Saudi Pro League club thlengin duhtu a nei a ni.

Blues hian Argentine forward manah hian pound maktaduai 50 an chhiar a, tun laia player man ngaihtuahin a to lutuk lo. Garnacho-a'n Chelsea a chhuahsan a nih chuan a hralhna aṭanga 10% chu a club hlui United-in an chang ve dawn.