Villa-in Manzambi an duh ve

Premier League club hlun Aston Villa chuan Freiburg midfielder Johan Manzambi lak luh tumin tha an thawh ve mek a, Newcastle United hel lai Manzambi hma hun a chiang lo zel.

Kum 20 mi Manzambi hi Newcastle-in Sandro Tonali thlak nan an ngaihven a, a man atan pound maktaduai 51.5 an thehchhuak ngam. Club pahnihte pawh Swiss midfielder chungchangah an inrem hman hial.

Mahse Villa an lo lang ve a, pound maktuduai 60 thehchhuah inhuam nia sawi a awm. Villa hian World Cup khelh meka inhliam an midfielder Amadou Onana chu a tlem berah thla sarih tal a chawlh dawn avangin Manzambi hi a thlakna turin Unai Emery-a'n a duh.

Villa hi season liam ta khan Europa League-ah an champion a, season tharah Champions League an khelh dawn avangin Magpies aiin an dinhmun a ṭha zawkah a ngaih theih. Manzambi tan inngaihtuah nawn lehna tham a ni

Magpies hian Italian midfielder Tonali an chân tawh a, midfielder pawimawh, Bruno Guimaraes chu Arsenal nen an sawi zawm mek bawk. Newcastle hian midfield tih chak an mamawh a, Manzambi hi an duh ber a, mahse chang thei turin thapui an thawh a ngai tawh mai thei. Khawthlang chanchinbu ṭhenkhat chuan a hma hun chu Manzambi thu thu a ni tawh niin an sawi.

Manzambi hi Switzerland tan World Cup khelin an feh chhuak a, rinrawl a ni phâk. Quarterfinal-ah champion lai Argentina an hneh loin an tla tawh thung. Mimal takin Freiburg midfielder hi a che ṭha a, match liah goal thum a khungin assist pahnih a nei bawk a, 'Best Young Player Award' dawng thei tur zinga mi a ni.

Freiburg tan pawh vawi 58 a inlan tawh a, goal riat thun tawhin assist 11 a nei tawh bawk. Tunlai rawlthar 'hot' ber zinga mi a nih avangin transfer bazar ti ngaihnawmtu tur a ni.

Hetihlai hian Manzambi hi last 16-a Colombia nen an inhmachhawn dawn khan, warm up-naah a khup a tihnat avangin a inkhel thei lo a, Argentina lakah pawh a inlan thei tawh lo.