Spurs-ah Wemby a nghet

Victor Wembanyama chuan San Antonio Spurs-ah a ngheh zia tilangin contract thar a ziak a, a contract hi kum nga daih niin US dollar maktaduai 252 zeta hlu a ni a, kum khatah maktaduai 50.4 hlawh ang a ni dawn. Hei hi NBA-a season li la hmang tling lo ho an pek theih sang ber a ni.

Kum 22 mi Wemby chuan, "Spurs chhungkua te u, hetah hian ka awm reng dawn e. Eng pawh tawk turin ka inhuam reng e," tiin an puanzar a nih hma hret khan social media-ah a lo ziak tawh.

Wemby hian a season nganaah sum tam zawk a hmuh theihna turin Spurs hi nawr thei mah se, a khelh mekna club a hmangaih zia a lang a, sum an hman tlem theih dan ber tur a ngaihtuahpui tih a hriat.

Kum 2023 NBA Draft-ah Wemby hi number one pick a ni a, All-Star-a vawi hnih thlan ni tawhin season hmasa khan Spurs chu NBA Finals a luhpui a, New York Knicks lakah vanduaiin nomawi an chawi ta lo.

Season hman zawh takah khan regular season game 64-ah inlanin, match khatah block 3.1 nei ziah ang a ni a, point 25, rebounds 11.5 leh assists 3.1 average-in a nei thei bawk.

French center hi NBA-a Defensive Player of the Year chawimawina dawng thei naupang ber a ni a, hemi ṭum hian a vote-tute zawng zawngin an thlang vek. A kum a la tam loh bawk avangin MVP a la nih theih a rinawm.