England-ah Premier League-a khel lo player panga an awm

Thomas Tuchel-a'n World Cup khel tura player 26 a koh khan Europe pawna khel player pakhat a ko a, a hming chu Ivan Toney a ni. Kum 30 mi Toney hi Saudi Arabia club Al Ahli FC tan a khel mek a, World Cup khel tura koh a nih khan mak tih a hlawh a, hei aia la mak chu England semifinal kalkawngah vawi khat mah a la inlan lo.

Toney baka Premier League pawna khel player palite erawh club liana khel an ni hlawm. Bayern Munich striker Harry Kane-a'n captain armband hrengin hmun pawimawh a chang a, Real Madrid midfielder Jude Bellingham a langsar viau bawk. England tan Jude leh Kane te hian goal ruk ve ve an khung tawh a, anni baka goal khung tawh chu Barcelona forward Marcus Rashford chauh a awm. Rashford hian goal khung tawh mah se hmun pawimawh erawh a chang pha lo a, Mexico leh Norway an hmachhawn ṭumin a inlan lo.

Bayer 04 Leverkusen aṭangin Jarell Quansah koh a ni bawk a, kum 23 Quansah-a'n player inhliam zarah khelhna hmun chang pha mah se Mexico nen hnawhchhuah a nih avangin Norway an hneh ṭumin hrem vangin a inlan thei lo a, Argentina an hmachhawn hunah pawh a la inlan thei dawn lo.

England player zingah goalkeeper baka la inlan miah lo pathum an awm a; Toney bakah Trevoh Chalobah leh Kobbie Mainoo te an la inlan lo. Thomas Tuchel-a'n Liverpool aṭangin player a ko lo a, season liam taa Manchester United tana khel a koh chhun Mainoo pawh a la chhawr lo. Norway an hneh ṭumin Mainoo aiah defender hliam dam kawr Reece James chu midfield-ah a chhawr zawk.