Man United-in Santos an tlangzarh ta

Premier League club lian Manchester United chuan an elpui, Chelsea aṭangin Andrey Santos an la lut fel ta. Brazilian midfielder hian medical test paltlang tawhin Old Trafford-ah kum 2031 thleng châm turin contract a ziak. Michael Carrick-a player lakluh hmasa ber niin Thawhṭanni zan khan an tlangzarh a, jersey no. 17 ha dawn.

Man United hian kum 22 mi Santos man atan pound maktaduai 50 an theh chhuak a, Blues hi pound maktaduai 48 an pe phawt dawn a, a chet ṭhat dan a zirin pound maktaduai hnih an pek belh leh ang. Hei bakah hian an hralh leh a nih chuan an hralhna man aṭanga 10% chu Blues hian chang ve turin inremna an siam bawk.

Brazilian rawlthar chuan, "Ka player ngaihsante bakah mi ropui tak tak lo khelh tawhna a nih avangin, Manchester United hi an danglam bik. Midfielder ka nihna angin Michael Carrick-a hnuaia inzirna hun remchang ka nei thei tur hi ka phur takzet a, hma ka sawn theih nana min pui turin ani aia ṭha an awm bik lo. He club-in hmachhawp sâng tak a neihte tihlawhtling tur leh, inelna hrang hranga nomawi chawi turin ka inpeih tawh a, ka phur tawh hle a ni," a ti.

An midfielder pawimawh Casemiro chu United hian a contract an pawhsei sak lo a, Brazilian midfielder hian Inter Miami a pan dawn a, Old Trafford-ah a châm dawn lo. Hei bakah hian Paris St-Germain aṭanga an lak Manuel Ugarte-a'n beisei a pha lo a, hralh tum mah se World Cup a khelhnaah a khup a tihnat avangin tun nipuiah chuan a chhuah theih a beiseiawm loh.

Hetiang boruak karah hian Red Devils hian an buaina sut kian nan Nottingham Forest midfielder Elliot Anderson lakluh an tum a, mahse an ṭhenawm Manchester City chuan pound maktaduai 116 zeta an ngam avangin an beiseina a thamral zui.

United hian Anderson an chân hnuah West Ham player Mateus Fernandes lamah an mit an len leh a, mahse ani pawh hi tun nipui transfer-a sum hmang na tak Tottenham-in an lak khalh leh a, a man hi pound maktaduai 85 a la ni hem mai. Italian midfielder Sandro Tonali pawh an lalut thei lo a, Spurs-in £100mtd bawr vel an seng ngam tlat.

Red Devils hian sum an theh chhuak tam ngam lo a, an player duh ber la loin an sum theh chhuah ngam tawka ṭha ber an la thung. Chelsea tana hmun pawimawh chang pha lo Santos lam an melh a, Blues lamin kum thum kal taa £18mtd bawr vela an lakluh player hi man to zawka chhuah an phal nghal. London club hi a lawm zawk an ni hial ang.

World Cup ṭan hma lawk khan Atalanta aṭangin Brazilian midfielder tho, Ederson chu pound maktaduai 35-in inremna an lo neihpui tawh a, mahse World Cup aṭanga Brazil an tlak hnuah Ederson hian a khup hliam vangin medical test a paltlang zo lo a, Old Trafford a pan dawn ta lo.

Carrick-a'n a player duh ho a la thei loah a ngaih theih a, Santos chungah a lungawi a ngai. Mahse, Santos hi kum 22 chauh a la nih bakah league-ah tawnhriat a neih tawh avangin dah hniam a thiang lo thung. A hnampui Casemiro hmunruak luah khat tur erawh chuan a ṭan a ngai dawn. Man United hian Santos an lakluh hnu hian Belgium captain Youri Tielemans an lalut hnai a, Aston Villa aṭangin a release clause £35mtd-in an la chhuak dawn.

Tunkar tawp July 18, Inrinni hian Helsinki-ah Manchester United-in Wrexham nen pre-season match hmasa ber an khel dawn a, senior player zingah midfield laia khel tur Mason Mount chauh a awm. Carrick-a tan Santos awm belh tur hi chanchin lawmawm a ni ang.