Dutch referee Dieperink a thi

Netherlands football referee Rob Dieperink chu 13, Thawhṭanni khan a thi a, kum 38 mi referee hi a thih chhan hi puanzar a ni lo thung.

Dieperink hi kumin World Cup-ah video assistant referee (VAR) atan ruat zingah a tel ve hman a, mahse hmeichhiat mipatna kaihhnawihah a inhnamhnawih avangin May thla khan FIFA-in World Cup official aṭangin a paih.

Dutch referee hi April thla khan mipa naupang khuaikhem tumna chungchangah man a ni a, mahse finfiahna ṭha tawk tak a awm loh avangin a thubuai hi tihtawp a ni a, Dieperink hi chhuah a ni zui.

Netherlands Football Association (KNVB) chuan, "Dieperink thihna hian min ṭhawngin min tilungngai takzet a, referee thiam leh tha tak kan chan a ni. A thawhpui, a chhungte leh a laina hnai zawng zawngte kan tawrhpui takzet a ni," tiin thuchhuah an siam.

Kum 2017 aṭang khan Dieperink hi Eredivisie-ah inkhel a enkawl ṭan a, Euro 2024 khan VAR official-ah a awm bawk. World Cup official aṭanga paih a nih khan a lawm lo hle a, an puhna chu thu dik lo a nih thu a sawi.