Alonso-a'n cham turin Enzo a duh

Chelsea manager thar Xabi Alonso chuan an midfielder Enzo Fernandez chu, Real Madrid nen sawizawm ni mah se chhuak lo turin a duh a, Argentine midfielder dinhmun a chiang lo chhunzawm zel.

July 13, Thawhṭanni khan Alonso hi Stamford Bridge-ah lawm luh a ni a, Fernandez kawl a duh leh duh loh chungchang an zawhna chhangin, "Club-a cham turin ka duh a, amah nen pawh kan inbe tahw. Mahse kan thil sawi chu sawi chhuah kher a ṭul lo," a ti a, Fernandez a chhuak dawn lo niin a sawi.

Season hman zawh takah khan kum 25 mi Fernandez hi Chelsea elpui Manchester City nen pawh sawizawm a lo ni tawh a, a hnu lawkah Los Blancos zawm tur anga sawi thawm a awm leh bawk. Argentine midfielder bakah hian City midfielder pawimawh Rodri chu Real-a kal tur anga sawi a ni lo tawh bawk.

Fernandez hi tunah Argentina tan World Cup khelin a feh chhuak mek a, semifinal thleng tawhin zaninah England nen an inhmachhawn dawn. Ram tan pawh Fernandez hi rinrawl a ni phak a, a dam ṭhat phawt chuan Lionel Scaloni-a tan player pawimawh a ni.

Blues hi season hmasa laklawh laiin Enzo Maresca nen an inṭhen a, beiseina sang tak nen Strasbourg aṭangin Liam Rosenior la lut lut mah se, thla li hnu lawkah an ban leh nghal. Blues hi table-ah 10-na an ni a, Europe inelnaah an tel ve dawn lo.

Season tharah Bayer Leverkusen coach hlui hoin indinthar an tum dawn a, an player langsarte an chelh a pawimawh ang. London club hian coach ban mai an awlsam a, Alonso pawh hian Champions League khel phak tura a hruai thlen theih loh chuan a dinhmun a derthawng leh nghal a rinawm.

Hetihlai hian World Cup khel zo hlim Nicolas Jackson chuan, Australia-a pre-season tour nei turin squad a zawm dawn a, Bayern Munich-a loan-a a khelh hnuah Senegal forward hian Blues a zawm leh dawn.

Alejandro Garnacho erawhin training a la zawm lo a, AS Roma nen sawizawm an nih bakah Alonso-a'n Argentine forward chungchangah thuchhuah a la nei lo. Manchester United aṭanga pound maktaduai 40 zeta an lakluh Garnacho hi a chhuah a rinawm tawh zawk.