Croatia manager thar Bilic

Croatia football team chuan an manager thar atan anmahni lo enkawl tawhtu Slaven Bilic an ruai a, 2006 aṭanga 2012 chhung lo enkawl tawhtu Bilic hian Zlatko Dalic a thlak dawn.

World Cup khelh mekah Croatia hian round of 32-ah Cristiano ronaldo telna Portugal an hneh lo a, an tlak hnu lawk hian Dalic chuan a hna bansanin Croatia enkawl chhunzawm a tum lo. Kum 59 mi Dalic hian kum kua dawn an ram team hi a enkawl hman.

Dalic a chhuah rualin Croatia-in Bilic an be nghal a, rei lote hnuah inremna an nei nghal. Kum 57 mi Bilic chuan, "Ka thawhpuite hi ka ringtawk a, Croatia hi football khawvela ram lian leh thiam zingah an awm reng theihna turin chakna thar, chona leh tumruhna pek chu ka tum a, chu chu ka mawhphurhna a ni.

He chona thar hmachhawn tur hian ka hlim takzet a, ka inpeih tawh hle bawk. Kum 2006 ai khan tawnhriat ka ngah tawh zawk a, mi puitling ka ni tawh bawk. Mahse Croatia hi ram chak tak, huaisen leh hlawhtling taka siam turin keimaha chakna erawh a la danglam chuang lo," a ti.

Bilic-a hi an ram tan hian vawi 44 a inlan thei a, kum 1998 World Cup-ah khan Croatia tan a khel nghe nghe. An ram inkhel kalhmang a hriat avangin an ruai nawn leh hi a mak hran lo.

Croatia manager a nih hmasak zawk khan, match 65 aṭangin vawi 42 hnehna an chang a, vawi 15 an khingpuite an inhnehtawkpui a, vawi 8 chiah an tlawmin record a ṭha hle.

Club lamah pawh tawnhriat a nei ṭha a, club hrang hrang a ebkawl zingah West Ham United, West Bromwich Albion leh Watford-te chu a langsar zual an ni a, 2023-2024 season khan Saudi Pro League club Al-Fateh a enkawl a, hei hi a club hnuhnung ber a ni.