Manchester United-in £35mtd-in Tielemans an lalut

Manchester United chuan Aston Villa aṭangin Youri Tielemans chu pound maktaduai 35-in an la lut a, kum nga atan contract an ziahpui. Belgium captain release clause hi £35mtd a ni a, Villa tan an player pawimawh hi chelh ngaihna a awm lo.

Kum 29 mi Tielemans hian Villa tan hian season thum a khel a, hemi hma hian Monaco aṭangin Leicester City a pan. Foxes-a hming a chher hnuin Villa hian free transfer-in June 10, 2023 khan an la lut.

Casemiro thlaktu

Man United-in season liam taa an khaipa Casemiro contract an pawhsei sak lo a, Brazilian midfielder kalsan tak jersey no. 18 chu Tielemans hian a ha dawn.

Tielemans chuan, "Manchester United ka zawm thei hi ka inchhuang hle. Hetiang club ropuia ka khel thei tur hi ka ngaihlu. Football ka khelh ṭantirh aṭanga tun thlenga thawhrim rah ka seng a ni," tiin a sawi a, Man United tana a khel thei tur chu a lawm hle.

Tielemans chu

Kum 29 mi Tielemans hi player langsar vut ni lo mah se player vantlang chunglam a ni a, boruak sang a ngam viau bawk. FA Cup 2021 final-ah khan Leiceser City-in team ṭha zawka ngaih Chelsea 1-0 in an hneh a, goal awmchhun khungtu chu Tielemans hi a ni.

Tielemans hi man of the match-a thlan a ni a, hemi ṭum hian tuna Man United coaching staff zinga mi Jonny Evans hian Foxes tan bul a ṭan.

Kumin khan Aston Villa-in Europa League nomawi an chawi a, final-ah Freiburg 3-0 in an hneh. Hemi ṭum pawh hian Tielemans-a'n goal hmahruai a khung a, hun pawimawhah goal pawimawh a khung.

Tielemans hian kum 16 leh ni 82 mi lek a nihin Anderlecht tan a khel ṭan a, kum 20 a tlin hnu lawkah kum 2017 khan Monaco a zawm. Kum 20 a nihin Tielemans hian club leh ram tan match 578 a khel tawh a, goal 79 a khung tawh.

United-in an la lut

Manchester United-in nikum season tawp hmain Casemiro chhuah tur thu an puang a, Manuel Ugarte chhawr an tum loh bawk avangin centre midfielder an mamawh dawn tih an hre nghal.

Premier League-a langsar ber Elliot Anderson bakah Newcastle United midfielder pahnih Bruno Guimarães leh Sandro Tonali bakah West Ham United midfielder Mateus Fernandes te nen sawizawm an ni a, sum an thehchhuah tam ngam loh avangin an la lo vek.

Man United hian Andre Santos (£48mtd) leh Tielemans (£35mtd) lakluh nan £83mtd an seng a, City-in Anderson lakna mana an sen £116mtd an phak lohna chu £33mtd a ni. Sum ang zawng chuan United an hlawk phawt a, a fuh ang em, tih erawh hunin a hril ang.

Khawthlang media te tarlan danin tun ṭumah pawh hian United hian thutlukna siam turin player-te 'data' an hmang nasa. Hemi hmang bawk hian World Cup nomawi chawi thei Emiliano Martinez aiah Senne Lammens an la lut a, season liam taa an khelh dan bikah chuan an tifuhah a ngaih theih.

Tielemans hi number 8-a khel ṭhin a nih avangin Casemiro thlakna ni loin Kobbie Mainoo elpui tur a ni thei dawn a, Chelsea aṭanga an lak Santos hian no. 6 hna a chelh thei ang. Belgium captain hi Atalanta midfielder Ederson an lak tak loh aiah a ngaih theih a, United hian Casemiro thlakna tur tak hi an la zawng chho mek thei bawk.