Italy enkawl tur zingah Guardiola

Manchester City boss hlui Pep Guardiola chu Italy head coach thar ni tura an duh an thlan chhuah zingah a tel nia sawi a awm a, Kum 55 mi Guardiola hi Italian Football Federation chuan an ropuina rama hruai kir leh turin an duh.

Hello Pep

Kumin May thla khan Pep hian kum 10 chhung ngawt a lo enkawl tawh City a chhuahsan a, Chelsea coach hlui Enzo Maresca-a'na thlak dawn a, tunah club enkawl lai a nei lo a, hna nei loin chawlh a hmang mek.

Mahse football ram lian Italy meuhin an sawm a nih chuan, chona thar hmachhawn nuam a tih bawk avangin beisei aia hmain football team enkawl hna hi a luhchilh leh thut thei bawk.

Pep hian Barcelona, Bayern Munich leh Manchester City te enkawl tawhin nomawi 41 zet a chawi tawh a, Europe club inelna sang ber Champions League nomawi pathum a kawl bawk.

Maldini-a'n a duh

Kar hmasa lawk khan Italian Football Federation (FIGC) technical director thar Paolo Maldini leh President Giovanni Malago, te chuan coach thar rawih chu hna hmasaah an nei dawn. Kum 58 mi Maldini hi 2019 aṭanga 2023 inkarah khan a club khelhna ṭhin AC Milan-ah technical director a lo ni tawh a, Milan tlu chhe tur a khai din leh ang khan Italy chhanchhuaktu turin an duh.

Maldini leh Malago ten coach thar rawih chu hna hmasa atan an nei a, Guardiola lam an hawi nghal. Spanish coach hi a team enkawl apiang a chet ṭhatpui ziah a, club enkawl lai a neih loh lai tak a nih bawk avangin hming langsar zinga a tel hi a awm lo hran lo.

Mahse!

He hna chelh tur hian Pep hian harsatna a neih a rinawm loh a, chutihrualin a hlawh tur hi harsatna lian ber tura ngaih a ni thung. Guardiola hian City-a a season hnuhnung berah khan kum khatah pound maktaduai 20 chuang zet a hlawh a, kar khatah pound 385,000 hlawh ang a ni. Hei bakah hian a chet ṭhatpui dan a zirin maktaduai 25-a kai chho thei tur a ni bawk.

Serie A club te chu an ram coach thar hlawh tur hi an thawh khawm ve tura ngaih a ni a, mahse chu chuan England-a Guardiola hlawh zat bang kha a pha dawn chuang lo niin Italian chanchinbute chuan an tarlang.

Barcelona pawh lo enkawl tawhtu hian a football career-ah national team coach luhchilh a duh nia sawi a awm a, tun hnaiah Italy bakah England manager ni tur pawhin a hming a ri ring hle.

Azzurri enkawl tur hian Guardiola bakah anmahni lo enkawl tawhtu, Roberto Mancini leh Antonio Conte te chu hming langsar zual an ni a, Mancini phei hi chuan 2021 khan Euro-ah England hnehin a lo champion pui tawh nghe nghe. Andrea Pirlo leh Carlo Ancelotti te pawh he hna thawk thei tur hian thlan chhuah zingah an tel bawk.