Ngaihven hlawh Belgian Grand Prix

Formula 1 ngainatute ngaihven hlawh Belgian Grand Prix chu July 19, Pathianni hian ṭan a ni leh dawn a, season dang ang bawkin Spa-Francorchamps track-a intlansiak tur hian boruak a ngah leh tawh hle.

Inelna neihna hmun tur Spa-Francorchamps hi driver te vanram tih hial koh a lo ni tawh ṭhin a, tlan chak theihna lai bik, kawng kawi harsa (blind corners), kawng chho leh chhuk thut thut te a awm avangin lap tinah rilru pek a ngaih bakah huaisen a ngaih avangin a driver chona hmachhawn nuam tite tan duhthusam a ni.

A khaw awm dan inthlak thut thut thei a nih bawk avangin, kawng a nal dan inang lo lai a tam a, inlehpel turin thiamna bakah inrintawkna leh huaisenna neih a ngai bawk. Aston Martin driver Fernando Alonso chuan Spa hi 'driver thiam tak takte an lanchhuahna hmun' a ti hial a, tun thlengin hei hi a la dik zel.

Belgian GP track hi a len tham avangin hmun ṭhenkhatah ruah a sur laiin a ṭhenah a ro thei bawk a, khua a ṭhat loh chuan kawng kawiah driver te tana hlauhawm khawpa kawng nal lai a awm ṭhin avangin chetsualna pawh a lo thleng tawh ṭhin.

Kum 2010-ah phei kha chuan minute khat chhung ni a sa a, a hnu lawkah ruah a sur leh thut ṭhin. Hemi ṭum Lewis Hamilton chu pakhatna a ni a, driver dang an chetsual mah se a chesual ve duh lo a, phu takin hnehna a chang.

Ferrari driver Hamilton hian Belgian GP-ah hnehna chan a tum tawh hle a, a teammate Charles Leclerc nen a team hlui Mercedes el phak an tum hle. Kum 41 mi Hamilton hian F1 inpui tia hriat British GP-ah khan pathumna ni mah se insiamṭhat a ngai tih a sawi a, podium lawn mah se pakhatna a nih loh avangin a lungawi lo a, hnehna chan a tum tawh hle.