Red card vanga rilru pe thei lo Balogun

Kumin World Cup thlengtu zinga mi USA striker Folarin Balogun chuan, red card a hmuh avanga match khat hremna a hmachhawn tur FIFA-in an sutsak hnu khan amah leh a team-te beihna leh inhnialna nasa tak a siam dawn tih a rinlawk thu leh, hemi avanga game-ah rilru a pek theih loh thu a sawi.

Kum 25 mi Balogun hian round of 32 Bosnia & Herzegovina nen an inkhelh ṭumin Bosnian defender Tarik Muharemovic a rah palh avangin hnawhchhuah a ni a, match khat hrem tura tih ni mah se US President Donald Trump leh FIFA inbiak hnuah a hremna hi hlihsak a ni.

He thutlukna hian sawiselna nasa tak a chawk chhuak a, a bik takin US President Donald Trump chuan an dilna chungchanga lawmthu a sawi avangin sawi zui a hlawh hle. An inkhelh banah amah leh a team-te'n auh elna a tawk nasa hle.

Balogun chuan, "A tir berah chuan team-a ka let leh thei kha ka lawm hle a, mahse ka ngaihtuah chian hnu khan thil thlen dan avang khan inhnialna nasa tak a chhuak dawn tih ka hria.

Thil thleng zen zen lo a nih avangin ka ṭhiante te pawhin keimah vangin zâmna an nei tih ka hmu thei a, sawiselna thawm a nat avangin pumpelh theih a ni lo, inkhelah rilru pek a harsa takzet a, kei lah chuan tih theih ka nei bawk si lo. Mahse ka teammate te hi ka unau ang an ni a, hrehawm taka ka awm lohna turin min hnem reng," a ti.

Direct-a red card an pek avanga hremna pumpelh hi thil thleng khât tak a ni a, Balogun hi Belgium an hmachhawn dawna an inbuatsaihnaah pawh a tir lamah a tel ve lo hial.

Monaco forward hian kumin World Cup-ah goal thum khung a, USA tan player pawimawh a ni. Red card a hmuh hnuah Belgium lakah inlan leh mah se beisei a pha zui lo a, hun tawp lamah thlak a ni hialin a team chu hnehna a chanpui zo chuang lo.