Man United keeper thar Darlow

Manchester United chuan Leeds United aṭangin Karl Darlow chu a thlawnin an la lut a, kum 35 mi goalkeeper hian June 2028 thleng cham turin contract a ziak a, kum khat pawt sei turin inremna an siam bawk.

Season liam ta khan Darlow hian Leeds tan match 38 khelin rinrawl a ni a, season tawp ruala a contract a tawp avangin a duhna lam a hawi thei a, United hian back-up keeper an mamawh bawk avangin an lo rim chat.

Red Devils tan Senne Lammens chu khawih chet thiang lo a ni a, Andre Onana chu season hmasaa a khelhna Trabzonspor-ah loan-in an kaltir leh a, Altay Bayindir chhawr chhunzawm an tum loh bawk avangin Darlow hi Lammens thachhang dawltu tur a ni ang.

Newcastle United tan pawha khel tawh Darlow chuan, "Manchester United ang club ropui tak tana khelhna hun ṭha ka nei hi ka lawm takzet a, club tan theihtawp chhuaha inkhelh hlan ka nghakhlel tawh hle," a ti.

Man United director Jason Wilcox pawhin, "Darlow hian theihna sang tak a nei a, boruak sang taka inkhel tur leh United tana khel turin tawnhriat a nei ṭha tawk tawh. A taimak bakah rilru paukhauh tak a neih avangin squad tichhah turin ani aia thlanawm an awm bik lo," a ti bawk.

Club pahnihte inkarah hian indawrna a thleng zen zen lo a, a hnuhnung ber chu 2021 kha niin Daniel James chuan Old Trafford chhuahsanin Leeds hi a lo zawm tawh a, ani hmaa transfer hnuhnung ber chu Alan Smith kha niin 2004 daih tawh kha a ni.

Kum 2002 khan Ferdinand chuan Leeds aṭangin United hi a lo zawm tawh bawk a, a hunlaia defender man to ber ni turin Sir Alex Ferguson-a'n pound maktaduai 29.1 in a lo la lut tawh.