Brighton player man to ber Vuskovic

Premier League club Brighton & Hove Albion chuan an club chanchina an player man to ber ni turin, Tottenham Hotspurs defender Luka Vuskovic chu pound maktaduai 46-in an la lut a, a khelh ṭhat dan a zirin maktaduai 50 tling chho thei tur a ni.

Seagulls hian thla hmasa khan Croatian defender hi lak luh tumin Spurs hi an lo dawr tawh a, vawi thum an dawrna ah an hlawhtling. Kum 19 mi Vuskovic hian nikum khan Croatian club Hajduk Split aṭangin Spurs hi a zawm a, season liam ta khan Hamburg-ah loan-a kalin match 30 a khel a, goal ruk a khung bawk.

Vuskovic hian London club tan match khat mah khel hman lo mah se, hmabak êng tak a neih avangin Brighton hian an iai lo a, season tharah Conference League an khelh dawn bawk avangin an player man to ber ni turin an seng lut.

Croatian defender hian Jan Paul van Hecke thlak a tum dawn a, Dutch defender hian pound maktaduai 52-in Vuskovic-a club hlui Spurs a zawm ve thung. Van Hecke a thlak turin a ṭan ve deuh ngai dawn mah se, Vuskovic hi Bundesliga Rookie of the Season-a thlan zawh hlim a ni a, a inringtawk khawp ang.

Brighton defender thar hi an Croatia tan kum 16 mi chauh a nih laiin goal a khung tawh a, an ram tana goal khung thei naupang ber a ni. World Cup khelh mekah pawh khan Croatia coach Zlatko Dalic-a'n a ko a, England nen an inhmachhawn ṭum khan luhtir ve a ni.