Remsiami'n Olympic a khel dawn?

India mipa leh hmeichhe hockey team chu Olympic 2020 khel turin an in vaw tling. Nakkum nipui lai Tokyo khawpuia infiamna khawmpui lianah Mizo nula Lalremsiami Hmar kan hmuh ngei a beiseiawm. FIH Qlympic qualifier hi Inrinni leh Zirtawpni zan khan khelh a ni a, inkhel pahnih belhkhawmah India nulaten United States 6-5 in an hneh a, a vawi thum nan Olympic an khel dawn. Moscow 1980 leh Rio 2016-ahte khan an lo inlan tawh a ni.

Kalinga Hockey Stadium, Bhubaneswar-ah inelna neih a ni a, Zirtawpni zana khelh first leg-ah Lalremsiami telna India nulaten Unites States chu 5-1 ngawtin an sawp.

India tan hian Gurjeet Kaur-i'n goal hnih a khung bakah Lilima Minz,  Sharmila Devi leh Navneet Kaur ten goal khat ṭheuh an khung - second leg khelh tur la awm mah se Remsiami telna team hi tling tawhah a ngaih theih hial.

Mahse, rin ang ngawt a ni lo. US coach Janneke Schopman-a'n, "Game-ah chuan thleng thei lo a awm lo," tiin a sawi a, Inrinni zan khan khelmual chhungah a nauten huaisen taka India bei letin goal li ngawt an khung avangin rinkai zawk an ni let hman hial.

Inkhel tir lamah na taka nawr nghalin Amanda Magadan (5', 28'), Kathleen Sharkey (14') leh Alyssa Parker (20') te hmangin si phurh an sut zo der! US an khel ṭha zui a, inkhel an thunun bawk avangin goal an neih belh pawh a rinawm.

Amaherawhchu, India hian tawnhriat nei ṭha Rani Rampal an nei a, hun harsaah chhandamtu a ni. Captain Rani hian minute 49-naah goal hlu bik a khung a, he goal hi hmahruai nawn lehna a nih bakah a naute tan inrintawkna siamtu a ni a, an tum ram Olympic hruai thlengtu goal a ni bawk.

Olympic 2020-ah hian hockey huangah team 12 an inlan dawn. Khawmualpui ṭhen hran panga a champion chu an tling nghal. Hmun ruak dang hnawh khat tur hian qualifier paltlang a ngai. Hmeichhe inelnaah  Argentina,  South Africa, Netherlands leh New Zealand te chu khawmualpui champion an ni a, Asian Games champion Japan chu a thlengtu an nih avangin Asia ram quota hi qualifier hmanga zawn a ni ta zawk.

Hmun ruak pasarih dang la awmin India, Spain, China leh Australia te an tlin belh a, nizan khan hmun ruak pathum dang hi a hriat ang. Olympic khel tur hian kawng a thui hle. Qualifier khel phak pawh thil awlsam a ni lo. India nulate hi kumin August thla khan Olympic Test Event-ah an champion avangin qualifier-ah an inlan thei chauh a, Mipa team inlan theih chhan erawh FIH Series Finals-ah champion lo mah se final an luh phak vang a ni.

India hockey team-a player pawimawh Remsiami chuan, "Goal kha kan tihsual vanga lut zel a ni a, kan insiamṭha a nih chuan kan tlang kha chu ka ring reng tho. 5-5 a nih pawh khan kei chu ka chiai lem lo a, hun ṭha kan hlah zeuh zeuh kha a pawi," tiin inkhelh banah Vanglaini a hrilh. 

Kolasib nula chuan sawi chhunzawmin, "Inringtawk viau mah ila a tawpah kan chak chhan chu vanneihna a ni a, Pathian vang a ni e," tiin inchhuang thei an nih loh thu a sawi.

Mipa team-in Russia lakah harsatna an tawk lo, match hmasa zawkah 4-2 a hnehna an chan hnuin nizan khan 7-1 in an sawp nawn a, a belhkhawmah 11-3 ngawtin an chak. India mipate hi a vawi 21 nan Olympic atan an tling - 2008 Beijing Games tih loah chuan an khel vek.

India hmeichhe hockey team-ah Lalremsiami Hmar-in hmun pawimawh a chang zel a, tun hnaia inelna lian leh pawimawh an hmachhawn dawn apiangin Remsiami hi thlan bik zingah a tel ziah. US lakah pawh goal khung lo mah se mual sir vei lamah a thiamna hmangin khingpuite a chhaih buai thei hle.

Kolasib nula Siami chuan, "Kan thil tum hmasa chu Pathian hruaina zarah kan ti hlawhtling ta. Theihtawp chhuahin kan thawkrim em em a, bang loa min ṭawngṭaipuitute vangin tun hi kan thleng a ni. "Olympic tak tak khelh hmain thil tam tak a la thleng thei, tun ang zela ka khel a nih chuan inlan theih ngei pawh beiseina a sang, ka hma hun chu Pathian kutah ka nghat," tiin Vanglaini a hrilh.

Nakkum July 24 aṭanga August 9 chhung hian Tokyo Olympic neih a ni dawn, Mizo nula Siami hian hliam na tak a nei emaw, thil a inher danglam thut a nih ngawt loh chuan India team-ah a tel ngei a rinawm - Japan khawpuiah Mizo nulain Olympic a khel lai kan en ngei a beiseiawm hle.

Olympic atana tling tawhte

1    Argentina    Pan American Games

2    South Africa    African Olympic Qualifier

3    Netherlands    Euro Hockey Championship

4    New Zealand    Oceania Cup

5    Japan    Asian Games

6    India    FIH Olympic Qualifier 

7    Australia    FIH Olympic Qualifier

8    China    FIH Olympic Qualifier

9    Spain    FIH Olympic Qualifier

Note : Germany vs Italy; Ireland vs Canada; Great Britian vs Chile ten hmun ruak pathum an hnawhkhat leh ang.

1    Japan    Asian Games

2    Argentina     Pan American Games

3    South Africa    African Olympic Qualifier

4    Belgium    EuroHockey Championship

5    Australia    Oceania Cup

6    India    FIH Olympic Qualifier 

7    Canada    FIH Olympic Qualifier 

8    Netherlands    FIH Olympic Qualifier 

9    Spain    FIH Olympic Qualifier 

Note : New Zealand vs South Korea; Great Britian vs Malaysia; Germany vs Austria ten hmun ruak pathum an hnawhkhat leh ang.