FA-in ban tlak Tuchel an chhan

England rama football thuneitu sang ber Football Association chuan Argentina laka an tlawm hnuah Thomas Tuchel ban tumna an nei lo niin khawthlang media-te chuan an ziak. German manager hian Euro 2028-ah Three Lions a enkawl chhunzawm ang.

England-in kum 1966 hnua a vawi khat nan final luh an inbeisei a, Argentina lakah 1-0 in hma hruai mah se Lionel Messi leh a ṭhianten 2-1 in an lehthal.

January 2025 khan England-in Tuchel hi thla 18 atan contract an ziahpui a, an hmachhawp lian ber chu World Cup champion a ni. Kumin February thla khan kum hnih atan contract an pawhsei leh bawk.

FA chief executive Mark Bullingham chuan, "Kan tum ram kan hnaih a, a rilru nat thlak hle. Thomas leh player-ten theihtawp an chhuah. Tun inelnaah kha ai khan squad, coach leh staff te kha an thawkrim thei lo ang. An chungah lawmthu ka sawi a, a hmuna ṭawiawmtu leh kan rama thlawptu mipuite chungah lawmthu ka sawi bawk," tiin a sawi a, ban lam a sawi lang lo.

Inkhelh banah Thomas Tuchel chuan, "Kan contract neih sa angin Euro C'ship chu kan mual ngeiah kan khel ang. Hun harsa tak kan tawh mek avangin hma thlir thui tak neih rih a harsa chungin hmalam pan zel kan tum. Chak loh vangin lunghnur miau mah ila, semifinal kan thleng a, football ram ropui ṭhahem takin semifinal an thleng lo. Kan thlen chin hi hlawhtlinna a ni pha," tiin a insawifiah.