Liverpool-in player thar lakluh nual an tum

Liverpool head coach thar Andoni Iraola chuan club-in nipui transfer window inhawn laiin, squad thuam chakna turin theihtawp chhuaha hma an lak mek thu a sawi a, player thar lak luh nual a tum thu a sawi bawk.

Thla hmasaa kum 44 mi Iraola hian chanchinbumite a kawmnaah club-in player chhuak ta Mohamed Salah, Andy Robertson leh Ibrahima Konaté te thlakna tur an zawn mek thu a sawi a, inthlak danglamna a awm dawn tih a sawi.

Reds hian player pahnih, Rennes aṭangin defender Jérémy Jacquet bakah, Osasuna forward Victor Muñoz an la lut fel tawh a, mahse an la induhkhawp lo a, mi thar an la melh chhunzawm zel.

A inpeih

Spanish coach Iraola chuan, "Player pahnih kan la lut tawh ngei a, mahse player dang kan la mamawh belh tih kan hria. Club-in hemi chungchangah hian hma a la mek a, kei pawhin theih ang angin puih ka tum ve mek a ni," tiin Iraola chuan a sawi chhuak.

Coach ka nihna ang chuan pre-season training hmasak ber ni aṭanga player te awm kim vek turin ka duh a, mahse a theih loh tih ka hria. Liverpool hi club lian leh ropui tak a ni a, fiahna leh chona hmachhawn tur a tam dawn tih ka hria.

Mahse he club hi a ropuina rama hruai kir leh ka duh a, kan hmaa awm leh eng pawh hmachhawn turin ka inpeih a, chumi huam chuan helai hmun hi ka rawn pan a ni," a ti.

Tu nge an melh?

Liverpool hi Mohamed Salah-a'n a chhuahsan hnuah amah thlakna tur an melh nghal a, Munoz la tawh tho mah se an duh ber erawh RB Leipzig forward Yan Diomande a ni. Kum 19 mi forward hian season hman zawh takah khan Bundesliga-ah goal 14 leh assist pakua a nei thei a, World Cup khelh mekah an ram Ivory Coast tan a fehchhuak bawk.

Diomande hian hmabak êng tak a nei a, chuvangin a man a tlawm dawn lo. Leipzig pawhin Ivory Coast forward manah hian pound maktaduai 100 ai tlem an dawng duh dawn lo nia sawi a awm bawk. Reds hi Bradley Barcola nen pawh sawizawm an ni a, mahse Arsenal nen an inhnaih tawk zawk.

Engtin zel?

Iraola hian kum thum chhung Bournemouth a enkawl hnuah tun season tawpah khan a chhuahsan a, June 2023 aṭanga a enkawl hnuah beisei phak bakin a chet ṭhatpui a, season liamta khan parukna nihpuiin Cherries chanchina an thlen san ber ṭum a ni a, season tharah Europa League an khel dawn.

Cherries-a a record a ṭhat avangin Iraola-a'n rimtu a ngah a, Premier League bakah Europe club lian hrang hrangin an ngaihven. Mahse a tawpah Anfield lam a pan a, Dutch coach Arne Slot a thlak dawn. Slot hian Reds hi a season khatnaah a champion pui thei a, Iraola hmabak a ko hle.