Trossard-a'n Besiktas a zawm ta

Belgium forward Leandro Trossard chuan Arsenal chhuahsanin Besiktas a zawm ta. Kum 31 mi Trossard-a manah hian Turkish club chuan pound maktaduai 15.3 an seng a, mahse kum thum chhunga pek tlak turin an inrem. Trossard hian kum thum daih contract an ziak a, kum khat dan pawhsei theihna a awm dawn bawk.

Trossard hian January 2023 khan Brighton & Hove Albion aṭangin £21mtd in Arsenal hi a zawm a, Gunners tan hian match 174 khel hmanin goal 36 a khung a, assist 34 a nei bawk. London club-ah kum 2027 thleng contract nei mah se chona thar hmachhawn a thlang ta zawk.

Mikel Arteta-a hoten season hmasaa Premier League champion an nihna kawngah Trossard hi player pawimawh a ni a, kumin World Cup-ah pawh an ram innghahna pakhat a ni a, Belgium tan match ruk aṭangin goal hnih khung a, quarterfinal-ah Spain lakah an tlawm thung.

Gunners hian Trossard a chhuah tak hnuah hian Club Brugge attacker Christos Tzolis lak luh an tum nghal a, kum 24 mi Tzolis hian season liam ta khan Belgian Pro League-ah goal 17 leh assist 23 a nei thei. Greece international hi hun eng emaw lai aṭang tawh khan an lo hel tawh a, £30 mtd vela lak theih an inbeisei.

Hetihlai hian Arsenal hi Julian Alvarez nen sawizawm an la ni chhunzawm zel a, Gunners hian Argentine forward manah hian Viktor Gyokeres pek tel an huam niin khawthlang chanchinbuten an tarlang.

Arsenal hian league title an kawl lai chu humhim an tum hle a, Atletico Madrid forward bakah hian Paris St-Germain forward Bradley Barcola leh Aston Villa forward Morgan Rogers te an ngaihven bawk a, mahse player pahnihte la lut tur chuan sum an sen hnem a ngai dawn.