Belgian Grand Prix-ah khua ṭha dawn em?

Pathianni zana Belgian Grand Prix neih turah ruah sur theihna chance a tlahniam a, vawiin leh Inrinnia khaw awm danin inelna neih tur chu a nghawng dawn niin zirchiangtute chuan an sawi.

Tun kar tir lam kha chuannasa taka ruah sur tura rin a ni a, mahse darkar 48 hnuah khawchin thlirlawkna hi a inthlak thut. An tlanna tur Spa-Francorchamps hi ruah a sur chuan hmun ṭhenkhat laiah kawng nal leh hlauhawm a awm ṭhin avangin, driver te tan ruahsur lo tura rinna hi lawmna tham a ni.

Inrinnia qualifying session neihna turah pawh hian ruah sur theihna hi 0% a ni a, a intlansiak ni ber tur Pathianniah ruah sur theihna hi 28% a tling a, mahse a hma ni hnih velah ruah a sur tam loh chuan buaina tham a tling lo tura ngaih a ni.

Inelna neihna hmun tur Spa-Francorchamps hi driver te vanram tih hial koh a lo ni tawh ṭhin a, tlan chak theihna lai bik, kawng kawi harsa (blind corners), kawng chho leh chhuk thut thut te a awm avangin lap tinah rilru pek a ngaih bakah huaisen a ngaih avangin a driver chona hmachhawn nuam tite tan duhthusam a ni.

Season dang ang bawkin kumin Belgian GP-in ngaihven a hlawh a, inelna ṭan a nih hma hauhin boruak a so sang tawh. Ferrari driver Lewis Hamilton chu boruak tisangtu pakhat a ni a, British GP-ah a teammate Charles Leclerc nen podium lawn mah se, Hamilton hi pathumna a ni a, Spa-ah chuan pakhatna nih ngei a tum tawh dawn.

Hetihlai hian tun hnaia chanchin ngah tak George Russell a che ṭha a, Mercedes-a nghet lo anga sawi Russell hian F1 inpui tia sawi British GP-ah Leclerc chiah a tluk lo a, tun season-a podium vawi nga a lawnna a ni.

A teammate Andrea Kimi Antonelli erawh a zawna vawi nga pakhatna a nih hnuah a tlahniam hret a, intlansiak hnuhnung berah pawh khan 15-na a ni pha hram a, driver leaderboard-ah hmahruaitu ni mah se amah hnaih bertu Russell nen point 25 chiahin an inthlau tawh a, a dinhmun ngai luah reng turin ṭan a lak thar a ngai.