Spain laka an khelh danah Mbappe a lawm lo

French forward Kylian Mbappe chuan Thawhlehni zana Spain laka an khelh danah a lungawi thei lo a, semifinal-a La Roja an hneh lohnaah chhuanlam siam tum lo mah se pawm thiam harsa a ti.

Kum 27 mi Mbappe chuan, "Midfield-ah khan anmahni pahnih leh pathum inhmachhawn ang kan ni a, Fabián Ruiz leh Rodri te khan duhtawkin an khel thei a, nawr kan tumna kawngah khan kan thawhhona a ṭha tawk lo bawk.

Mimal anga inhma-chhawn a, kan tlanchakna hmang ṭangkai tur kan ni a, Spain lamin game an thunun hmaa na taka nawr kha kan ruahman dan a ni a, mahse kan ti puitling thei lo a ni. Kan 'first touch' a ṭha tawk lo a, kan tihsual apiangah a vuak letna kan tawrh zel avangin kan chak ta lo a ni," a ti

Real Madrid forward hi Spain lakah a bo a, hun tawp dawn hnaia Spain keeper Unai Simon a tihtluk avangin yellow card a chawi a, a ṭang ulh deuh niin a lang. Final lut zo lo mah se Mbappe a che ṭha a, match sarih a khelh aṭangin goal riat a khung a, assist pathum a nei bawk.

France hian Pathianni zing dar 2:30-ah England nen Miami-ah thla pathumna nih tumin an inkhel leh dawn a, champion zo lo mah se Mbappe tan golden boot dawn theihna chance a la awm.