United-in Summerville lam an hawi

Manchester United chuan an forward Marcus Rashford-a'n a chhuahsan a nih chuan, Crysencio Summerville lam an hawi dawn a, West Ham winger hi £30mtd ai chuan a tlawm a rinawm loh.

Premier League-a an inhamtan zawh loh hnuah West Ham hian he kum 24 mi Summerville hi a man phu tawka dawrtu an hmuh chuan hralh an pawi ti lo a, Dutch forward hian theihna sang tak a neih avangin club tam takin an ngaihven.

Summerville hi World Cup-ah Netherlands tan a feh chhuak a, match li khelin goal hnih leh assist pahnih a nei thei. Round of 16 thleng zo lo mah se mimal taka a chet ṭhat avangin duhtu a ngah a, United hi hming langsar an ni.

Hetihlai hian Rashford leh United an inkar a ṭhat loh avangin a hmalam hun a chiang lo a, mahse Michael Carrick-a'n English forward hi Old Trafford-a châm turin a duh nia sawi a awm.

United hian tun karah midfielder pahnih Andrey Santos leh Youri Tielemans te an lo la lut tawh a, an pahnih man belhkhawm hi £82mtd a tling a, free transfer-in Karl Darlow chu Leeds United aṭangin an la lut bawk.

Midfielder pahnih la tawh mah se Carrick-a'n a la duh belh a, Roma midfielder Manu Koné, Bournemouth midfielder Alex Scott leh Real Madrid midfielder Eduardo Camavinga te nen sawizawm an ni mek.