Liverpool leh City an 'comeback'

Inrinni zan Premier League inkhelah Liverpool leh Manchester City ten hun rei zawk si phur mah se hun tawp lamah team huaisen danglamna an pholang a, hnehna an chang ve ve. 

Reds hian 1-0 a an hnufual reng hnuah minute 85 hnu lama Andy Robertson leh Sadio Mane goal khung hmangin Aston Villa chu 2-1 in an lehthal a, Premier League table chung ber an luah chhunzawm zel. City thawnthu a danglam lo. Southampton laka 1-0 a an hnufual reng hnuin Sergio Aguero leh Kyle Walker goal hmangin an 'comeback' a, 2-1 in an chak hram. 

Liverpool leh City hi Premier League match an neih leh hmasak berah an intawng dawn a, November 10 zana team pahnih inhmachhawn tur hi nghahhlelhawm tak a tling ta. 

'Champion tur chuan vanneihna ken tel a ngai' tiin sawi a ni ṭhin a, chu champion zia chu Liverpool-in an la chhawm nung zel - hun pek belh minute linaa Mane goal hmangin Villa an hneh! Villa hian minute 21-naa Trezeguet goal hmangin hma an hruai a, Roberto Firmino chuan an si phurh a sut niin inngai mah se VAR hmanga ennawn a nih hnuah sawisel theih takin pawmsak a ni lo. 

Fabinho-a'n yellow card a hmuh chuan City a hmachhawn thei dawn lo tih hriain Jurgen Klopp-a'n season hmang ṭha tak midfielder hi bench-ah a dah a, a hmun ruaka lut Adam Lallana-a talbuai hle. Mahse, Lallana, Mane leh Mohamed Salah ten chance duhawm tak an hlah hnuah Reds vanneihna a her chhuak a, goal khung tumin an huaisen tel bawk. Minute 87 hnuah Robertson leh Mane ten goal an rawn khung - Liverpool an chak. 

Leicester City-in 9-0 a an sawp hlim Southampton lakah City chu awlsam taka chak tura ngaih an ni a, mahse League Cup-a 3-1 a an hneh hnu ni bawk lakah point 3 an hlawh chhuak awlsam lo - minute 13-na lekah Saints tan James Ward-Prowse chuan goal hmahruai a rawn khung. 

City-in inkhel an thunun zui a, fans tam zawk rilruah chak tho tura inngaihna rilru nen thla a phang lo - mahse Pep Guardiola naute hian an beisei goal an hlawh chhuak lawk lo a, an dinhmun a derthawng hman. Vawi tam City lo khai chhuak tawhtu Aguero chu minute 70-naah chhandamtu ni turin a rawn lang a, si phurh a rawn sut. Argentine striker khung tur siamsaktu Kyle Walker chuan minute 86-naah a khung ve leh zui a, City an chak daih!

City-in chance an neih dan leh game an thunun dan enin chak lo se 'vanduai' tia sawi tur an ni ang a, mahse minute 70 hnu lama goal hnih khung an nih miau avangin 'vannei' tia sawi chi an ni.