Juventus-in Torino an ngam

Serie A inum boruak a sang zel a, Inrinni zan khan hmahruaitu Juventus leh an hnuai chiaha awm Inter Milan te chuan an khingpui ve ve ngamin hnehna an chang. 

Juventus-in Torino mualah goal hmu turin minute 70 an nghah thlen a ngai a, Dutch rawlthar duhawm Matthijs de Ligt chuan Juve tana a goal hmasa ber khungin a team hi hnehna a chanpui. Mikhual team tan Cristiano Ronaldo chuan vawi hnih ngawt chance duhawm a nei a, mahse Portuguese forward vanneih ṭum a ni lo. 

Gonzalo Higuain chuan volley mawi zet hmangin a khung teuh viau bawk a, mahse Torino si ban nghaktu hi Salvatore Sirigu a nih avangin 'teuh' ah a kal ral. Torino vanneih ṭum a ni lo a, injury time-ah Gleison Bremer chuan a team tan point a hlawh chhuak niin inngai mah se a goal khung hi offside vanga pawm a ni lo. 

Juve inlan hmaa inkhel Inter Milan chuan khualmualah 2-1 in Bologna an hneh ve bawk a, Romelu Lukaku chuan goal hnih a khung. Inter hi 1-0 in an hnufual reng a, mahse Lukaku hian minute 75-naah si phurh a sut a, hun pek belhah penalty hmanga khung lehin an chak. Napoli-in result duhawm an nei hleithei lo a, an mikhualna ramah AS Roma chu 2-1 in an ngam lo.