NT Biakkima a lo kir leh ta

Mizo boxer lar NT Lalbiakkima chuan ring chhung a lut leh dawn ta a, zanin hian Nepal boxer lar Lal Prasad Upreti nen an inhnek dawn - an inhnekna tur hmun hi ExpoInn Suites & Convention, Greater Noida a ni.

NT-a hian hun rei tak chhung chu chhungkaw thil leh harsatna hrang hrang vangin ring chhung a rap tawh lo a, tunah inhnek turin a lo kir leh ta. NT-a chuan, "Ka inbuatsaihna a ṭha a, hnehna chan ngei pawh ka inring.

"Tun hma ang kha ka ni leh tawhin ka hria," tiin Vanglaini a hrilh a, Mizo boxer lar bera chhal ngam hian ring chhung lut tura a inpeih leh at tawh thu a sawi.

NT-a hian June 2022 khan World Trade Centre, Dubai-ah Jayson Vayson chu hmachhawnin, WBC Asian Continental title an inchuh a, mahse, lightflyweight-a inhnekah NT-a a tlawm a, Philippines boxer hi a ngam lo.

Mizo tlangval NT-a tan professional boxing a luhchilh hnua a tlawm hmasak ber a ni a, a hnuah fight vawi hnih hmachhawn lehin, a chak ve ve. Mahse, NT-a hian harsatna hrang hrang avangin boxing ring a luh chhunzawm lo a, rei tak a chawl.

NT-a hi December 2023 khan a nupui Lalrinchhani'n a thihsan a, a hnuah kawng engkima amah buaipuitu Dr. Lalmuanpuia leh a nu Lalthanpuii te a chân leh a, a hmain a pa NT Zomawia chuan a thihsan tawh bawk.

Kum 2018-a world number 1 Hasanboy Dusmatov hneh a, Indian media-te titi luah phak Mizo boxer tawrh hi a namai lo. Mahse, Zokeite a tlawm duh lo a, tunah chuan boxing ring chhungah a lo kir leh dawn ta.

Mizo boxer lar hian social media lamah an inhnek tur chungchang pholangin, "He thil hi ka fanu tana ka tih a ni a, kan chhungkaw tan a ni. Vanramah chuan chhungkaw hlim ber kan la ni ang," a ti a, mittui karah beiseina a hmu.

NT-a hmachhawn tur Lal Prasad Upreti hi Nepalese boxer ṭha a nih avangin Siaha boxer tan hna a awlsam dawn lo. Hetihrual hian a lo kir lehna inkhel a nih avangin chak ngei a pawimawh dawn.

Greater Noida-a inhnek tur hi zan dar 5:00-ah The Punch Boxing YouTube channel-ah pekchhuah tur a ni dawn a, NT-a te inhnek hi main event tur a nih avangin an inhnek meuh chuan a tlai deuh ang - member tan chauh a en theih dawn avangin Rs. 115 chawi a ngai ve thung ang.