Arsenal-in Saliba hliam endik dawn

Premier League champion Arsenal chuan an defender pawimawh William Saliba hnungzâng na chu an lo endik dawn a, Saliba chawlh chen tur hi la hriat loh mah se thla li aṭanga thla nga tal a chawl dawn niin khawthlang chanchinbuten an ziak.

A tuar rei tawh

French defender hi hun eng emaw lai aṭang khan hnungzâng na vangin a lo buai tawh a, World Cup thlengin he harsatna hian a kiansan lo. Semifinal-a Spain nen an inhmachhawn ṭumin Saliba hi minute 30 chauh a inkhel thei a, Crystal Palace defender Maxence Lacroix-a'n thlakin 2-0 in an chak lo zui.

Kum 25 mi Saliba hian ball a chan laiin a pet chhuak a, na tuar chhunzawm thei loin leiah a ṭhu hnawk. Medical team ten an buaipui laiin, "Ka hnungzâng a na lutuk," a ti a, hemi hma pawh hian tlarhnunga a dinpui Dayot Upamecano hnenah a tawrh theih tawh loh thu a lo sawi bawk.

London-a a let leh hunah Gunners hian Saliba hi zai a ngaih dawn leh dawn loh an enfiah dawn a, mah se zai a nih chuan dam chhuak leh turin hun a duh rei dawn avangin zai pumpelh hram dan an zawng ang.

A pawimawh

Saliba hian Mikel Arteta hnuaiah hmun pawimawh a chang a, season hman zawh takah khan inelna hrang hrangah Arsenal tan vawi 50 a inlan a, kum 22 chhung zet an lo nghah tawh Premier League-a an champion theihna tur leh, Champions League final an thlen theih nan player pawimawh berte zinga mi a ni.

France tan pawh Gunners defender hian hmun pawimawh a chang a, group stage match hnuhnung bera Norway nen an inkhelh ṭum chauh khan a inlan lo. Mahse knockout stage-ah erawh Didier Deschamps-a'n an match khelh zawng zawngah bul a ṭantir vek.

World Cup ṭan dawn khan Saliba chuan, "Thla eng emaw zat chu hliam tenau ka lo nei tawh a, Champions League leh Premier League-ah game pawimawh a awm avangin ka lo tuar hram hram ṭhin. World Cup phei chu kum li danah chauh a awm thin a, chuvangin ka intichak lui hram hram," tiin a lo sawi tawh.

Tu nge an melh?

Arsenal hian an defender rinrawl chu a dinhmun a chian loh avangin amah thlaktu tur an ngaihven nghal a, Aston Villa defender Ezri Konsa leh Barcelona centre back Ronald Araujo te an rim.

Gunners hi defender pahnihte nen sawizawm ni mah se England international Konsa lam an awn zawk a, kum 28 mi hi Premier League-ah tawnhriat a lo neih tawh avangin Saliba thlak tura hming ri ring ber a ni.

July 2019-a Villa a zawm hnuah Konsa hi tlarhnungah ban rinawm a la ni zel a, inelna hrang hrangah Villa tan match 286 inlanin goal 12 a thun ve tawh. Kumin World Cup-ah pawh Konsa hi Three Lions tan feh chhuakin, game sarih an khelhah vawi ruk inlan vein player pawimawh a ni.

Hetihlai hian Villa hi season thara Champions League khel tur an ni a, Youri Tielemans-a'n Manchester United a zawm tawh avangin Konsa hi a chhuak a nih pawhin a man a tlawm dawn lo.

Konsa hian Villa Park-ah kum hnih châm turin contract a la nei a, a man an chhiar ang zata Arsenal-in an dawr a nih loh chuan Gunners boss hlui Unai Emery-a'n chhuahtir a phal a rinawm loh.

Arteta-a'n Premier League an champion theih nana pawimawh Leandro Trossard chu Besiktas-ah a chhuahtir tawh a, a thlakna turin Christos Tzolis chu an be nghal a, euro maktaduai 40-in an inrem tawh niin Fabrizio Romano-a'n a tarlang.

London club hian Villa player tho Morgan Rogers an beisei bawk a, Rogers pawh hi a man a tlawm dawn lo. Gunners hian an title kawl lai hum an tum bakah a vawi khat nana UCL champion an tum avangin sum sen an hreh lo hle.